Կարեն Հակոբջանյան. «Հիմա, երբ ՌԴ–ում խորհրդարանական ընտրությունները ցույց տվեցին, որ Պուտինն ինքը «դաբրոյի» կարիք ունի, «ազատ, բայց սերժատու» ԶԼՄ–ները սկսել են նախկինի պես «տակից» կծել Ռուսաստանի գործող վարչապետին ու վերադարձել են Մեդվեդևին քծնելու «դարաշրջանին»»։

Արման Սահակյան. «Եթե նախագահական նստավայրում շատ են հետաքրքրված ԲՀԿ–ի հետագա վարքագծով ու քաղաքական պահվածքով, ապա մի փոքր օգնեմ նրանց և ներկայացնեմ իմ կանխատեսումներն այս թեմայով։ Եվ այսպես...»

Արեգնազ Մանուկյան. «Ճշտելու համար, թե որ պատգամավորն ինչպես է քվեարկել կառավարությանն անվստահություն հայտնելուն, ԱԺ քարտուղարությունից վերցրեցինք սղագրությունը։ Պարզվեց, որ այդ հարցին մի շարք հանրապետականներ դեմ չե՛ն քվեարկել, ինչպես և նախապես հայտարարել էր ՀՀԿ խմբակցության ղեկավար Գալոււստ Սահակյանը։»։

Կարեն Հակոբջանյան. «ԱԺ նախագահի ու փոխնախագահի նշանակումներից հետո երբ Նիկոյանն ու Շարմազանովը զբաղեցրեցին իրենց տեղերը, ԱԺ նորանշանակ խոսնակը կատակով դիմեց դահլիճին։ «Լա՞վ ենք նայվում»,– հումորային տոնով հարցրեց Նիկոյանը։ Ասեմ, որ շատ լավ եք նայվում, պարո՛ն Նիկոյան (չգիտես ինչու հիշեցի հայտնի «Նիկո և Նայս» գովազդը)»։

Արման Սահակյան. «ԲՀԿ-ի առանձին մասնակցելու դեպքում Ծառուկյանը ստանալու է երկրի առաջադեմ ուժերի ոչ թե քողարկված, այլ արդեն բացահայտ աջակցությունը: Իսկ եթե հանկարծ, իշխանական նեղ թիմը փորձի ավելի սրել ճնշումները և դրանք հանել խաղի կանոններից, ապա արաբական գարունը ընդամենը մեկ օրում կհանգրվանի Բաղրամյան պողոտայում»։

Կարեն Հակոբջանյան. «Ամեն ինչ կարելի էր պատկերացնել, բայց պատկերացնել, որ «7 օրին» մի օր կփորձեն «լևոնականի» պիտակ կպցնել՝ երևակայությունս չէր հերիքում։ Բա ու՞ր մնաց մեր՝ «քոչարյանականի» պիտակը, որը նույն համառությամբ ուզում էին կպցնել «սկզբունքայինները»։ Սրանց որ լսելու լինենք՝ Լևոնն ու Ռոբերտը «չերեզ» մեր կայք արդեն լեզու են գտել իրար հետ։ Այստեղ են ասել. գլխներիդ ձուն գա»։

Կարեն Հակոբջանյան. «Վարչապետը ծրագրել է հայկական կոնյակի արտահանման աշխարհագրությունը դիվերսիֆիկացնել և, մասնավորապես, մտնել չինական շուկա։ Կոնֆերանսի մասնակիցներին չասվեց, սակայն, թե արդյոք չինական շուկայի նկատմամբ Տիգրան Սարգսյանի հետաքրքրությունը պայմանավորվա՞ծ է այն բանով, որ իր եղբայրն այնտեղ արտակարգ և լիազոր դեսպան է և որ Սարգսյան եղբայրները հաջողված բիզնես նախագծեր են իրականացրել նույն Չինաստանում»։

Արման Սահակյան. «Լևոն Տեր–Պետրոսյանի վերջին ելույթին նախորդող ու հաջորդող օրերին նախագահական նստավայրից երկու տիպի «մուտիլովկա» էր տարածվում։ Մեկն այն էր, թե իբր ԲՀԿ–ն ՀՀԿ–ի հետ միասնական ցուցակով է մասնակցելու առաջիկա ԱԺ ընտրություններին»։

Արտակ Հակոբյան. «Ի տարբերություն Ռուսաստանի, Հայաստանում տնտեսական անկումը կազմեց երկնիշ թիվ` 14.4 %, ինչը կտրուկ նվազեցրեց մարդկանց կենսամակարդակը, և հետևանքն էլ իշխող ուժի համար նույնպես կտրուկ է լինելու»։

Կարեն Հակոբջանյան. «Նույնիսկ նավթով ու գազով հարուստ Ռուսաստանի ղեկավարները, փաստորեն, չկարողացան պահել իրենց իշխանական ռեսուրսները, ուր մնաց, թե արտաքին ու ներքին քաղաքականությունը լիովին ձախողած ու տնտեսական խայտառակ արդյունքներ արձանագրած Սերժ Սարգսյանն ու Տիգրան Սարգսյանը կարողանան վերարտադրվել»։

Կարեն Հակոբջանյան. «Իշխանության կողմից հասարակությանը պարտադրվող «Ո՞ր տեսակի տակ կուզենայիք կքած լինել՝ մականունավորի, թե՞ «ժելեոտածի»» երկընտրանքը կեղծ է, քանզի այս երկու տեսակի մեջ չէ, որ պետք է ընտրություն կատարի ՀՀ քաղաքացին»։

Կարեն Հակոբջանյան. «Արամ Սարգսյանը քաղաքականության մեջ մտավ Վազգեն Սարգսյանի սպանությունից հետո՝ հայտարարելով, թե եղբոր քաղաքական ժառանգության կրողն է, բայց, ինչպես ժամանակը ցույց տվեց, նա բազմիցս գաղափարապես դավաճանեց Վազգենին ու մսխեց նրա թողած ժառանգությունը»։

Արեգնազ Մանուկյան. «Վրացական կողմի տարածած այս տեսանյութում հստակ երևում է՝ ինչպես են Սահակաշվիլիի ելույթի ժամանակ (նայել 40–րդ վայրկյանից) ՀՀ ԱԳ նախարար Էդվարդ Նալբանդյանն ու ՀՀ աշխատակազմի ղեկավար Վիգեն Սարգսյանը խուճապահար միմյանց նայում ու անհանգիստ կերպով ինչ–որ բան սկսում քննարկել»։

Կարեն Հակոբջանյան. «Չենք ուզում մտածել, որ «Ժողովրդավարական հայրենիք» կուսակցության ղեկավարը դարձել է Սերժ Սարգսյանի նորաթուխ «դհոլներից»։ Մակեյանն ավելի շուտ «ազնիվ քյարփինջ» է և այս պահին ընդամենն օգտագործվում է Բաղրամյան 26–ի «ժողգործիքասեր» հասարակայնության կողմից»։

Արման Սահակյան. «Ասում են, թե Սերժ Սարգսյանը Ծառուկյանի ասածներից հետո քթի տակ դժգոհ փնթփնթացել է։ Գուցե հենց ա՛յդ պահից է սկսվել իշխանության նեղ թիմ – ԲՀԿ փոխադարձ հակակրանքը»։

Կարեն Հակոբջանյան. «Ո՞վ էր մեղավոր, և ո՞վ շահեց ոչ հռետորական հարցերը դեռ իրենց վերջնական պատասխանները չեն ստացել։ Մեկ բան, սակայն, ակնհայտ է՝ եթե չլիներ «Մարտի 1»–ը, ապա Սերժ Սարգսյանը չէր հայտնվի նախագահի աթոռին»։

Կարեն Հակոբջանյան. «Եթե չեմ սխալվում՝ 2008–ի նախագահական ընտրություններից հետո միշիկական լրատվամիջոցները մոտ 50 անգամ «վերլուծություններ» են ներկայացրել այն մասին, որ Սերժ Սարգսյանը վերջնականապես կապիտուլյացիայի է ենթարկել Գագիկ Ծառուկյանին։ Բայց որքան շատ են գրում նրանք այդ մասին, այնքան ավելի հզորանում է ԲՀԿ–ն»։

Սարգիս Շիրխանյան. «Շատ քչերն են այսօր Հայաստանում դրական տրամադրված երթուղայինների վարորդների` հիմնականում դյուրագրգիռ «մառշռուտնու շոֆեռների» նկատմամբ։ Համաձայնե՛ք. հաճախ չէ, որ կհանդիպես մարդու, ով գովաբանում է այս կամ այն երթուղայինի վարորդին` ընդգծելով նրա բարեկրթությունը կամ քաղաքավարությունը»։