Արեգնազ Մանուկյան. «Սերժ Սարգսյանի ասածներից դուրս է գալիս, որ Հայաստանը փորձարարական կենտրոն է, իսկ իրենք այդ կենտրոնում տարբեր բաներ են սովորում։ Սխալվում են ու սովորում, սխալվում են ու սովորում, և այդպես շարունակ»։

Կարեն Հակոբջանյան. «ՀՀԿ–ի գերիշխանության օրոք մենք աշխարհում ամենառեկորդային անկումներից արձանագրեցինք 2009–ին։ Տիգրան Սարգսյանի իրականացրած տխրահռչակ «բարեշրջումների» արդյունքում ՀՀ–ն մինչև օրս դեռ դուրս չի եկել ճգնաժամից, որքան էլ փորձեն հակառակում համոզել մեզ։ ՀՀ ընտրողները մազոխիստներ չեն, ու ՀՀԿ–ն դա շուտով կզգա իր մաշկի վրա»։

Կարեն Հակոբջանյան. «Մեր կողմից այժմ, ՀՀԿ համագումարին ընդառաջ, կփորձենք լրացնել այդ բացը և ներկայացնել Գեղամյանի գրքում «պատահաբար» բաց թողնվածը։ Սա էլ թող լինի ԱՄ առաջնորդի անտիպ գրքի շնորհանդեսը, որին հազիվ թե մասնակցեր Սերժ Սարգսյանը (չնայած ո՞վ գիտե, կարող է և մասնակցեր, ի վերջո նախաձեռնող նախագահ ունենք)»։

Կարեն Հակոբջանյան. «Արցախյան պատերազմի ժամանակ 5–րդ բրիգադը ղեկավարած փառապանծ ղեկավարը մեկ օրվա ընթացքում վերածվեց Հայաստանի ներսում քաղաքացիական հասարակության դեմ պայքարի 5–րդ շարասյան զորավարի»։

Կարեն Հակոբջանյան. «ԲՀԿ–ի դեմ գործի են դրվում ինչպես պեպելնիցայական, այնպես էլ «թնդանոթի մսի» ֆունկցիա կատարողներին խաղի մեջ մտցնելու մեթոդները։ Մեթոդներն այդ օգուտ չեն տալիս։ Ճիշտ հակառակը, գործում է բումերանգի էֆեկտը։ Այսինքն՝ դեռ հարց է, թե ում «պալաչն» է «Պալաչը». խորհրդանշական իմաստով, իհարկե»։

Արման Սահակյան. «Եվ այսպես, Հայաստանում, եթե հիմք ընդունենք «Երկիրի» հրապարակումը, Նորքի «Sorini» է իրացվում։ Դրանից հետո զարմանալի չէ, որ իշխանությունները պատրաստվում են «Սորինի» ընտրությունների, այիսնքն՝ պատրաստվում են կեղծիքների։ Այլ հարց է, որ դա նրանց մոտ չի ստացվելու։ Համենայնդեպս ամեն ինչ պետք է անել, որ կեղծիքներ չլինեն։ Ի վերջո, Հայաստանում պետք է պաշտպանվեն բոլոր տիպի իրավունքները՝ սպառողների իրավունքներից սկսած մինչև ընտրողների իրավունքները»։

Արեգնազ Մանուկյան. ««Որդյա՛կ իմ, տե՞ր ես, դո՛ւստր իմ, հնազա՞նդ ես»,–չզարմանաք, եթե ՀՀ մոդեռնիստ վարչապետի շուրթերից շուտով այս խոսքերն էլ լսեք։ Տիգրան Սարգսյանն այնքան է մտել «ինչ մինչև հիմա ոչ մի վարչապետ չի արել, ե՛ս կանեմ» դերի մեջ, որ բանուգործը թողած՝ արդեն ստանձնել է հարց լուծող տղու դերակատարությունը»։

Կարեն Հակոբջանյան. «ԱԽՔ–ն ու դատարկ դհոլը (Գեղամյանին այսպես է սիրում դիմել Սերժը) հանրության լայն շրջանակների համար վաղուց բացահայտված հաճախորդներ են և Ս. Սարգսյանին սատարում են «բաց ճակատով» ու «կուսազրկված» քաղաքական կարգավիճակով, իսկ Վազգեն Սարգսյանի եղբայր Արամն ու «ազնիվ քյարփինջի» համարում ունեցող Մակեյանը նույն բանն անում են ընդդիմադիրի «հագուկապով»»։

Կարեն Հակոբջանյան. «Դե հիմա թող օրինաց երկրի ջատագով և համատեղությամբ Սերժ Սարգսյանի հաճախորդ (բնորոշումը Սերժինն է) Արթուր Բաղդասարյանին պատկանող հիմնարկի գլխավոր իրավաբանը նորից սպառնա մեզ դատի տալ կամ փորձի հերքման տեքստ ուղարկել։ Անհամբերությամբ սպասում ենք «Հայասի Գրուպի» արձագանքին, որպեսզի անցնենք 3–րդ սերիային»։

Կարեն Հակոբջանյան. «ՀՀԿ վերնախավում շատ լավ հասկանում են, որ «կոնսենսուս մինուս մեկը» գնալով գործնական տեսք է ստանում։ Եթե նախկինում Տեր–Պետրոսյանը թիվ մեկ խոչընդոտն էր այդ հարցում, ապա այսօր, օբյեկտիվ ու սուբյեկտիվ պատճառներից ելնելով, դարձել է դրա թիվ մեկ ջատագովը, ինչը ողջունելի է»։

Կարեն Հակոբջանյան. ««Կոտա՞յք», թե՞ «Կիլիկիա» վեճի մեջ ես միշտ նախընտրել եմ «Կիլիկիան», բայց Հակոբ Հակոբյանի այս քայլից հետո «Կիլիկիա» այլևս չեմ գնելու։ Դա, իհարկե, չի նշանակում, որ «Կոտայքի» սիրահար կդառնամ, բայց «Կիլիկիա» հաստատ չեմ առնի, քանզի եթե այդ գործարանի տերն այդքան փոփոխական բնավորություն ունի, ապա արտադրության մեջ էլ այդ ամենը կարող է դրսևորվել, ինչն, իմ կարծիքով, կազդի գարեջրի որակի վրա»։

Կարեն Հակոբջանյան. «Արամ Սարգսյանին երևի դեռ երկար կհաջողվեր «ընդդիմություն» խաղալ, եթե քաղաքական զարգացումներն այլ բնույթ ունենային և եթե իր եղբայրը մանկական անկեղծությամբ ակամայից վերջնականապես չպայթեցներ քաղաքական դաշտի դանդաղ գործողության հերթական ռումբին»։

Կարեն Հակոբջանյան. «Տարոնի դեմ հակաքարոզչություն իրականացնելով՝ «նախաձեռնողականները» հիմքեր են նախապատրաստում, որպեսզի մի օր էլ նրան դարձնեն անհանդուրժելի և անընդունելի։ Շտապենք հանգստացնել քաղաքապետին. հիմա դեռ անհանդուրժելի դառնալու ժամանակը չէ, այնպես որ հանգիստ կարող եք զբաղվել «բուտիկների» հարցով»։

Արման Սահակյան. «Դատելով Շարմազանովի այն հայտարարությունից, թե ՀՀԿ ցուցակի առաջին համարը լինելու է Սերժ Սարգսյանը, դժվար է ասել՝ վա՞տ, թե՞ վատագույն տարբերակն են ընտրել Բաղրամյան 26–ում»։

Կարեն Հակոբջանյան. «Բաղդասարյանը մի կողմից խուսափում է հարկային պարտավորությունները կատարելուց, իսկ մյուս կողմից էլ պետության հաշվին ընտրողներին է սիրաշահում՝ զուգահեռաբար խոսելով օրինաց երկիր կառուցելու մասին»։

Կարեն Հակոբջանյան. « Սերժ Սարգսյանին անվերապահորեն աջակցում են բոլոր նրանք, ովքեր ծայրահեղ մարգինալներ են և այլ տարբերակ, քան շուրաբալագանովյան ոճով սեփական գոյությունը քաղաքական դաշտում քարշ տալը չունեն։ Եվ հակառակը՝ բոլոր նրանք, ովքեր նույնիսկ փոքր չափի ինքնուրույնություն և արժանապատվություն ունեն՝ Սերժ Սարգսյանին սատարելու հարցը ուղարկում են «Սուրոյենց կտուր»»։

Կարեն Հակոբջանյան. «Չեմ կասկածում, որ գեներալ Մանվելը, կախված իրավիճակից, առաջինն է լքելու Սերժ Սարգսյանին ճիշտ այնպես, ինչպես Վազգենին (հետմահու), Վազգենի եղբորը (նրա կենդանության օրոք), Ստեփան Դեմիրճյանին (հեռակա կարգով) և Լևոն Տեր–Պետրոսյանին (երկրորդ անգամ)։ Այսպիսով, ԵԿՄ–ի վերջին համագումարը շատ խորհրդանշական կարելի է համարել։ Հաշվի առնելով վերը նշված օրինաչափություններն ու ոչ վաղ անցյալի դեպքերը՝ պարտության ուրվականն այժմ պտտվում է ՀՀԿ–ի գլխավերևում, քանի որ Մանվելից սատարվող որևէ մեկը հաջողության դեռ չի հասել»:

Կարեն Հակոբջանյան. «Արթուր Բաղդասարյանի օրինակը պետք է դաս լինի բոլոր նրանց համար, ովքեր ուզում են պահել սեփական քաղաքական դիմագիծը և լինել ինքնուրույն միավոր։ Սերժ Սարգսյանը գործընկերային հարաբերություններ չի ընդունում. իրեն պետք են միայն հաճախորդներ և դատարկ դհոլներ։ Սարգսյանը սիրում է շրջապատված լինել գեղամյաններով, խոսրովներով, արթուրբաղդասարյաններով, մանվելգրիգորյաններով և այլ ազատիչներով»։