Կարեն Հակոբջանյան. «Համոզված եղեք, որ եթե Գյումրիում ԲՀԿ–ի անխուսափելի հաղթանակի պահը չլիներ, ապա Սարգսյանն անձամբ կմեկներ Գյումրի, և ինչպես Ռուբեն Հայրապետյանի ու նրա նմանների դեպքում եղավ, կդիմեր զոռով հրապարակ բերվածներին ու կասեր, թե բարի ավանդույթի համաձայն՝ ՀՀԿ–ն Գյումրիի քաղաքապետի պաշտոնում առաջարկում է Վարդան Ղուկասյանին, ու ընտրողներին կառաջարկեր հավատալ, որ փոխել»։

Արման Սահակյան. «Ա. Արսենյանը իր մատուցած ծառայությունների և այլ գործընկերային հարաբերությունների շնորհիվ Բաղրամյան 26-ից ձեռք է բերել մարզպետ նշանակելու իրավունք: Իրականում, սա մեխանիզմ է, որը քանդում է պետության հիմքերը: Նա պետության, իշխանության մարզպետը չէ, նա Ջերմուկի Արսենյանի մարզպետն է, և սպասարկելու է միայն ու միայն նրա շահերը։ Արսենյանը Բաղրամյան 26-ի համար ձայն կապահովի ու սրանով հարցը կփակվի»։

Կորյուն Մանուկյան. ««Սե՛րժ ջան, ինքդ էլ տեսնում ես, որ սիրուն չես կառավարում, լավ կլինի մի ձև գտնես ու մաքրես Բաղրամյան 26–ի տարածքը, թե չէ մե՛նք կապամոնտաժենք քեզ նախագահական աթոռի վրայից»։ Այ սա՛ կլինի քաղաքացիական հասարակության իրական հաղթանակը, թե չէ ընկել եք Ալեքսանյան Սամվելի հետևից ու «տիրացու» վարչապետի անձնական եկամուտների աճին եք նպաստում»։

Կորյուն Մանուկյան. «Շահնազարյանին հունից հանել է այն, որ ՀԱԿ–ը ԲՀԿ–ի ու ՀՅԴ–ի հետ համատեղ կարող է նախագահական նստավայրից հեռացնել Սերժ Սարգսյանին։ Իր գեղամյանությունը «լեգիտիմացնելու» համար՝ նա վախեցնում է հանրությանը «քոչարյանիզմի» բոբոյով, բայց, թերևս, չի զգում, որ դրանով իսկ նմանվում է ամերիկացի այն գեներալին, ով «սառը» պատերազմի տարիներին այնքան էր ներշնչվել ու վախեցել «կարմիր» վտանգից, որ իրեն նետեց պատուհանից դուրս և ջարդուփշուր եղավ»։

Կարեն Հակոբջանյան. «Մի շարք օբյեկտիվ հանգամանքներ հաշվի առնելով՝ ակնհայտ է, որ նախագահական ընտրությունների ժամանակ Սերժ Սարգսյանին հակակշռել և իշխանափոխության իրականացնել կարող են միայն ԲՀԿ, ՀԱԿ և ՀՅԴ տիրույթը ներկայացնող գործիչները։ Ուրիշ տարբերակ չկա։ Դուր է գալիս ոմանց այդ բանը, թե դուր չի գալիս, սա՛ է իրականությունը»։

Կարեն Հակոբջանյան. «Մոտ 150 հոգանոց համույթ ներկայացնող Սերժի «ժողգործիքները» փորձում են 150 հազ. մարդու «շուխուռ» անել և տեղեկատվական «սպամի» միջոցով «մուտիլովկաներ» տարածել։ Այսինքն՝ Սերժ Սարգսյանը 150 հազ. արտագաղթողի դեմ հանել է իր 150 հաճախորդներին»։

Կորյուն Մանուկյան. «Այսպես որ շարունակվի, բուհերում կարելի է արդեն փակել քաղաքագիտության ֆակուլտետները։ Չէ՞ որ «քաղաքագետ» դառնալու համար շատ խելք, կամ ավելի ճիշտ՝ խելք ընդհանրապես, պետք չէ։ Բուհերը լավ կանեն հիմա բացեն «քաղաքացիական ակտիվիստ» պատրաստելու ֆակուլտետներ։ Նախագահականից պետպատվերի պակաս չի զգացվի, ֆինանսավորման՝ նույնպես»։

Կարեն Հակոբջանյան. «2008թ. նախագահական ընտրություններից հետո ձևավորված ՀԱԿ–ում տարբեր տեսակետներ կային ապագա քայլերի վերաբերյալ։ Մի մասը գտնում էր, որ պետք է կոշտացնել պայքարը և, պատկերավոր ասած, փողոցից տուն չգնալ, իսկ մյուս մասի կարծիքով՝ ճիշտը «քարերը փեշից թափելն» ու Սերժ Սարգսյանի հետ երկխոսության գնալն է։ Ի վերջո, Կոնգրեսում հաղթեց երկրորդ մոտեցումը, և Տեր–Պետրոսյանը հնչեցրեց իր հայտնի ելույթը, որտեղ հիշեց Եղիազար Այնթապցու և էջմիածնական միաբանների մասին»։

Կորյուն Մանուկյան. «Ճակատագրի ինչպիսի՜ հեգնանք. նախընտրական փուլում Գեղամյանի դեմ «դհոլային» PR արած ու «Ազգային միաբանության» առաջնորդին անսկզբունքայնության համար մեղադրող Հմայակ Հովհաննիսյանն ինքն է այժմ դարձել Սերժի «ժողգործիքը»։ Սակայն ի տարբերություն Գեղամյանի, ով ճնշումների ու ստացած «զրոների» արդյունքում 2003թ. ու դրանից հետո ծառայություններ մատուցեց իշխանությանը, Հովհաննիսյանն ավանսով է «դհոլություն» անում»։

Կարեն Հակոբջանյան. «Զուտ տնտեսագիտորեն հարցին նայելիս՝ լրիվ պարզ է դառնում, թե ինչի կարող են հանգեցնել «Բջնին» ու «Նոյը» բոյկոտելու կոչերը։ Եթե այդպես արվի, ապա շատ կարճ ժամանակ անց այդ բիզնեսները բանկրոտի կենթարկվեն ու Ռ. Հայրապետյանը ստիպված պետք է լինի վաճառել դրանք։ Ակնհայտ է, որ գնորդը կլինի Հայաստանի կլանաօլիգարխիկ համակարգի պարագլխի՝ Սերժ Սարգսյանի շրջապատից, ընդ որում՝ շատ էժան գնով»։

Արտակ Հակոբյան. «Դավիթ Շահնազարյանի և նրա ընկերների կողմից ՀԱԿ-ի վարկանիշային կորուստը բացատրել ԲՀԿ-ի գործոնով` պարզ փարիսեցիություն է և ցինիզմ միաժամանակ, քանզի սույն գործիչը չի էլ թաքցնում, որ փորձել է ՀԱԿ-ը օգտագործել Սերժ Սարգսյանի ծրագրերում` որպես գործիք»։

Կորյուն Մանուկյան. «Բաղրամյան 26–ում, ըստ ամենայնի, չեն կողմնորոշվում, թե ԲՀԿ–ի ու անձամբ Գագիկ Ծառուկյանի հանդեպ ինչպիսի քարոզչական գիծ որդեգրեն և ինչպիսի քաղաքականություն վարեն։ Այսպես ասած՝ ցայտնոտի մեջ են։ Իսկ երբ հիշում են «Կոնսենսուս մինուս Սերժ Սարգսյան» ծրագրի և այդ ծրագրի կյանքի կոչման հարցում ԲՀԿ–ի գործուն մասնակցության մասին, ընդհանրապես դեպրեսիայի գիրկն են ընկնում»։

Կորյուն Մանուկյան. «Սերժ Սարգսյանն ու Ռուբեն Հայրապետյանը նույն արժեհամակարգի ու մտածողության, ասել է թե՝ նույն տեսակին են պատկանում, բայց «ֆուտբոլասեր» նախագահն ավելի վատն է, քան Հայաստանի Ֆուտբոլի ֆեդերացիայի նախագահը, և ահա թե ինչու ...»։

Կարեն Հակոբջանյան. «Չի բացառվում, որ մեզ առաջարկեն չորս շաբաթ շարունակ շաբաթվա բոլոր օրերին աշխատել, իսկ հինգերորդ շաբաթն ամբողջությամբ մնալ տանը։ Ճիշտ է, այդ դեպքում 28 օր աշխատելով կարող ես հալից ընկել, բայց «զատո» չընդհատվող 28–օրյակից հետո 7 օր շարունակ հանգիստ կունենաս ու եթե դրան էլ գումարվի մեռելոցի հերթական երկուշաբթին, ապա կարճատև հանգիստդ կդառնա բոնուսով, այսինքն՝ 8 օր»։

Կորյուն Մանուկյան. «Շահնազարյանը ցույց տվեց, որ վատ է զգում երբ իրեն դնում են Արամ Սարգսյանի կամ Անդրանիկ Քոչարյանի հետ նույն՝ ՀԱԿ–ը լքածների շարքի մեջ։ Նա շատ լավ գիտի, որ նշյալ մարդիկ ընդամենը Ռուբեն Հայրապետյանի կուռացիայի տակ գտնվող շարքային հաճախորդ են, իսկ ինքն, ահա, հավակնում է Սերժ Սարգսյանի՛ կուռացիայի տակ հայտնվելուն ու հաճախորդ դառնալուն, բայց ոչ շարքային»։

Կարեն Հակոբջանյան. ««ժառանգության» առաջնորդը հերթական անգամ ինքն իրեն չդավաճանեց և ցույց տվեց, որ սկզբունքային է՝ որևէ հարցի վերաբերյալ օրվա մեջ մի քանի անգամ որոշում կայացնելու, դրանք փոխելու, հետո վերջնական որոշումը վերափոխելու և ամենավերջում լրիվ այլ բան անելու հարցում։ Իր ոճին հավատարիմ և իր մարդկային որակների հանգույն՝ Րաֆֆին այս անգամ էլ քայլ կատարեց այն պահին, երբ արդեն այդ քայլը ոչինչ չէր որոշում և ինքը ստացել էր «Անորսալի Ջո»–ի կարգավիճակ»։

Կարեն Հակոբջանյան. «Ռուբեն Հայրապետյանին «անկախ» մամուլը չի սիրում ոչ թե «Հարսնաքարի» դեպքերի համար, այլ այն բանի, որ «չերեզ» Հայրապետյանին չսիրել հնարավորություն կա «մուտիլովկաներ» տարածել Գագիկ Ծառուկյանի դեմ՝ «Պետք է պայքարել բոլոր օլիգարխների դեմ» դեմագոգիկ կարգախոսի շրջանակներում։ Ճիշտ նույն կոդով, որով «անկախ» մամուլը չի սիրում Հայրապետյանին, սիրում է Արթուր Հարությունյանին՝ «Պալաչին», քանզի այս դեպքում արդեն հնարավորություն է ստեղծվում Արթուրին սիրելով՝ կրկին չսիրել Ծառուկյանին»։

Կորյուն Մանուկյան. «Հաշվի առնելով այն, որ Ա. Սարգսյանն ու Ռ. Հայրապետյանն իրար հրապարակավ ընկերներ են «պռիզնատ» եկել, և որ այս պահին կոնկրետ նեղ վիճակում է «Հարսնաքարի՛» տերը, ենթադրվում է, որ «Արամ Սարգայանն ընդդիմության միասնական թեկնածու» գաղափարը ծնվել է հենց Ռուբեն Հայրապետյանի մտահոգ գլխում»։