Կորյուն Մանուկյան. «Եթե մեզ բոլորիս հաջողվի հաղթանակ տանել նախագահական ընտրություններում, ապա ՀԱԿ-ը, բնականաբար, ունենալու է իր տեղը երկրի հետագա կառավարման մեջ, իհարկե՝ առանց Նիկոլի: Իսկ եթե այս գործընթացը ինչ-ինչ պատճառներով տապալվի, ապա պարտվելու ենք բոլորս` դարձյալ առանց Նիկոլի, ում, լավագույն դեպքում, սպասվում է Արտաշես Գեղամյանի ճակատագիրը (պատգամավոր դառնալու մոմենտով)։ Ասելս այն է, որ Նիկոլն ամեն դեպքում պարտված է»։

Կարեն Հակոբջանյան. ««Եթե ԲՀԿ–ի առաջարկին ընդառաջ գնաք, ապա դա կնշանակի, որ Քոչարյանի հետ եք ուզում համագործակցել»,– քաղաքական ուժերին անուղղակիորեն դիմեց «նախաձեռնող» նախագահը՝ ներքին հույս ունենալով, որ Քոչարյանով շանտաժ կիրառելը կաշխատի։ Նկատենք, սակայն, որ այդ «տրյուկը» չաշխատեց։ ՀՅԴ–ի, ՀԱԿ–ի և «Ժառանգության» ներկայացուցիչները կողմ արտահայտվեցին ԲՀԿ–ի հետ խորհրդակցություններ անցկացնելու նախաձեռնությանը»։

Կորյուն Մանուկյան. «Սերժ Սարգսյանի տարերքը կուլիսային ու փակ պայմանավորվածություններն են։ Բաց և հրապարակային պայքարից նա վախենում է այնպես, ինչպես սատանան խունկից։ ԲՀԿ–ն իր քայլով գործող նախագահին բերում է բաց դաշտ, ինչը չէր մտնում Բաղրամյանն 26–ի ծրագրերի մեջ»։

Կորյուն Մանուկյան. «Դատելով ամենից՝ Միքայել Մինասյանն ակնհայտերն իրեն է պատկերացնում Սարգսյանի ժառանգորդի դերում։ «Ժառանգորդ» օպերացիայի հաջող իրականացման գրավականը, ըստ փեսայի, Հայաստանի տնտեսական դաշտի ամբողջական մոնոպոլացումն ու քաղաքական դաշտի անապատացումն է, որոնք պետք է առաջիկա հինգ տարիներին լինեն ցանկացած գնով նախագահի աթոռին մնացած Սերժ Սարգսյանի օրակարգում»։

Կարեն Հակոբջանյան. «Գագիկ Ծառուկյանի թիմն իշխանափոխության ու համակարգափոխության ճանապարհային քարտեզ է առաջարկում և պատրաստակամություն հայտնում այդ հարցերում համագործակցել բոլոր քաղաքական ուժերի, այդ թվում՝ ՀՀԿ–ի առողջ հատվածի հետ։ Սա, ըստ էության, «Կոնսենսուս մինուս Սերժ Սարգսյան» ձևաչափը կյանքի կոչելու մեթոդաբանությունն է»։

Կարեն Հակոբջանյան. «Միակ իմիջը, որ հաջողացրել է իր վրա կարել Սերժ Սարգսյանն իր պաշտոնավարման ընթացքում, «ֆուտբոլային» շեղումներով թուրքամետությունն է։ Սերժի մոտ թուրքական գիծն այնքան բնական է ստացվում, որ ոչ մի PR–շիկի կարիք չկա։ Պարզ է, որ նա այդպես չէր ուզում, բայց այդպես ստացվեց, և Գյուլն այստեղ ոչ մի մեղք չունի. Սերժն ինքը գնաց այդ քայլին»։

Կորյուն Մանուկյան. «Սերժ Սարգսյանին պաշտոնապես աջակցում են մայիսի 6–ից հետո կոալիցիոն հուշագրով իրար հետ կապված ՀՀԿ–ն և ՕԵԿ–ը, ինչպես նաև բացահայտված հաճախորդ կուսակցությունների ղեկավարները։ Այստեղ որևէ անակնկալ չկա. այն ինչ արեց Սարգսյանն Արթուր Բաղդասարյանի ու նրա նմանների հետ, պարզապես պարտավոր էր «ամուսնանալ»։ Սերժ Սարգսյանն ունի նաև, այսպես ասած, թաքնված աջակցողներ»։

Կարեն Հակոբջանյան. «Սերժամետ քարոզչամեքենան գնալով ավելի ցինիկ է դառնում։ Պատկերացնու՞մ եք, մարտի 1–ի 10 զոհերի գնով նախագահականում հայտնված Սերժ Սարգսյանի պաշտպանները, փրփուրները բերաններին, մարտի 1–ի դարդն են անում։ Դատելով ամենից՝ հեռու չէ այն պահը, երբ Սերժ Սարգսյանն ու իր թիմակիցները դաժան քննադատության կենթարկեն «Ֆուտբոլային» դիվանագիտությունը՝ հայտարարելով, թե դրա մեղավորը ԲՀԿ–ն է, քանզի Սերժ–Գյուլ «սիլի–բիլիների» ժամանակ իշխանության մաս է կազմել»։

Կորյուն Մանուկյան. «Սերժ Սարգսյանին տալով 28%՝ «Gallup»–ը, փաստորեն, ցույց է տվել, որ «Կոնսենսուս մինուս Սերժ Սարգսյանի» կյանքի կոչման պարագայում ՀՀԿ ղեկավարը ոչ մի շանս չունի և կպարտվի նախագահական ընտրությունների ժամանակ»։

Կարեն Հակոբջանյան. «Ինչպե՞ս է պատահում, որ Հայաստանի տնտեսության վիճակը վատանում է, իսկ ահա կոռուպցիոներների «գլխից բռնելու» մեծ սիրահար Սերժ Սարգսյանի ընտանիքի անդամների, մասնավորապես՝ փեսա Միքայել Մինասյանի գործերը լավանում են, նրա սեփականությունն ընդլայնվում է ու մենք ականատեսն ենք դառնում, թե ինչպես է երիտօլիգարխը, զուտ նախագահի փեսայի «պաշտոնից» օգտվելով, մխրճվում բիզնեսի ու քաղաքականության մեջ»։

Կորյուն Մանուկյան. «Աբրահամյանը գլխավորեց խորհրդարանը ճիշտ այն նույն պատճառով, ինչ պատճառով որ այժմ դարձել է Սերժ Սարգսյանի շտաբի պետ։ Աբրահամյանին ԱԺ նախագահի պաշտոնը 2–րդ անգամ հանձնելով՝ Սերժ Սարգսյանը հույս ուներ նրա միջոցով Ծառուկյանի թիմից ստանալ «նոր» կառավարության ծրագրի սատարում և լոյալ վերաբերմունք իշխանության հանդեպ, սակայն կյանքը ցույց տվեց, որ Աբրահամյանի հնարավորությունները խիստ գերագնահատված էին»։

Կորյուն Մանուկյան. «Մի շարք հանգամանքներից ելնելով՝ կարծում ենք, որ «Ժառանգությունում» պետք է վերանայեն իրենց «Գալի՛ս ենք» կարգախոսը, քանզի կյանքը ցույց տվեց, որ նրանք ոչ թե գալիս, այլ տալի՛ս էին։ Ուրիշ բան չմտածեք։ Նկատի ունեմ այն, որ սուտ խոստումներ էին տալիս։ Օրինակ՝ խոստանում էին 50 % ձայն հավաքել ԱԺ ընտրություններում, բայց պարզվեց, որ Սերժին սխալ էին հասկացել ու ստացան մի զրո պակաս, և Քոքոբելյանն, ի դեպ, այստեղ մեղք չունի»։

Կարեն Հակոբջանյան. ««Ծառուկյանը Սարգսյանի հետ պայմանավորվել է ու սատարելու է ՀՀԿ ղեկավարին»,– սերժահաճո վարկածին հավատացողներին կխնդրենիք բացատրել, թե ո՞րն է այդ դեպքում լինելու Ծառուկյանի շահը։ Սերժամետ մամուլը չի էլ թաքցնում, որ վերընտրվելու դեպքում Սարգսյանը գնալու է մասնավոր սեփականության լայնամասշտաբ վերաբաշխման։ Եվ ուրմեն, ինչու՞ պետք է Ծառուկյանը գնա Սարգսյանին սատարելու ճանապարհով։ Որպեսզի երաշիքներ ստանա, որ չի՞ կորցնելու սեփականությունը։ Ումի՞ց երաշխիքներ ստանա։ Սերժի՞ց։ Լա՜վ էլի»։

Կարեն Հակոբջանյան. «Պարբերաբար հայտնվելով ՀՀ նախագահի փեսա Միքայել Մինասյանի և ՀՀ նախագահի օգնական Սևակ Լալայանի կողմից փաստացի կառավարվող լրատվամիջոցների մանիպուլյացիոն գործիքի դերում՝ «դհոլները» կոնկրետ առաջադրանք են կատարում»։

Կորյուն Մանուկյան. «ԱԺ–ում քննարկվող հաջորդ տարվա բյուջեն «անտեր» է։ Հարցն այն է, թե հաջորդ տարվա ընտրությունների արդյունքում ով է տեր կանգնելու նոր բյուջեին՝ տնաբույծ բոլշևիկնե՞րը, թե՞ ժողովուրդը»։

Կարեն Հակոբջանյան. «Անդրադառնալով իմ նախորդ նյութին՝ ՀՀ կրթության ու գիտության նախարար Արմեն Աշոտյանը ֆեյսբուքյան իր էջում գրել է, որ խորհրդանշական կարմիր շոռտիկը դեռ կա, և ինքը պատրաստ է այն նվիրել մեր խմբագրությանը՝ որպես իրեղեն ապացույց, բայց չի նշել, թե հատկապես ինչի՞ իրեղեն ապացույց։ Օրինակ՝ Մոնիկա Լեվինսկին որպես իրեղեն ապացույց պահել էր և հետագայում դատարանին ներկայացրեց այն ներքնաշորը, որը հագած էր եղել ԱՄՆ նախկին նախագահ Բիլ Քլինթոնի հետ մոտիկից հարաբերվելու ժամանակ»։

Կարեն Հակոբջանյան. «Կարեն Ավագյանը, հավանաբար, տարիքի բերումով այնքան էլ ծանոթ չէ իր հարազատ կուսակցության անցած ուղուն և տեղյակ չէ, որ մեր երիտասարդ պետականությանը հարված հասցրած Նաիրի Հունանյանի դեմ հարուցված գործի քննությանը չխոչընդոտելու նպատակով էր ՀՀԿ նախկին ղեկավար Անդրանիկ Մարգարյանը, Ստեփան Դեմիրճյանի ու Արամ Սարգսյանի հետ միասին, պահանջում Ավագյանի ներկայիս շեֆ Սերժ Սարգսյանի հրաժարականը»։

Կարեն Հակոբջանյան. «Փորձը ցույց է տալիս, որ ՀՀԿ–ի ահելների ու ջահելների մեծ մասը չի սիրում պաշտոնաթող մարդկանց։ Այդ ամենը հաշվի առնելով՝ կարելի է միայն պատկերացնել, թե ինչ է սպասվում Սերժ Սարգսյանին 2013թ. հետո։ Ամենայն հավանականությամբ՝ «7 օրը» ստիպված իր պաշտպանության տակ է առնելու ՀՀԿ այսօրվա ղեկավարին՝ կոչ անելով աշոտյաններին ու շարմազանովներին մեղադրել Սերժ Սարգսյանին միայն գործա՛ծ մեղքերի համար»։