«2013 թվականին Հայաստանի բնակչությունը նվազել է ևս 31 հազար»,- մեր երկրի առջև ծառացած ամենամտահոգիչ խնդիրն այսօր իր ելույթում այսպես ներկայացրեց առաջին նախագահը:

«Ստո՛ւմ եք, պարո՛ն Տեր-Պետրոսյան: Դա ուղևորափոխադրումների բացասական մնացորդն է լոկ: Նվազելու մասին խոսելուց այդտեղ առնվազն պետք է ավելացնել բնակչության բնական հավելաճը, որը 2013 թվականին պլյուս 14.605 է եղել…»,-Ֆեյսբուքյան իր էջում գրել է Հանրապետական Կարեն Ավագյանը:

Իսկ հիմա հիշեցնենք, թե ինչ էր ասում Կարեն Ավագյանի առաջնորդ Սերժ Սարգսյանը ԵԿՄ համագումարում.

«2013 թվականի տվյալներով, ուղևորափոխադրումը՝ համեմատած 2012 թվականի հետ, կրճատվել է, բացասական տարբերությունը գրեթե 25 տոկոս, և այդ բացասական տարբերությունը կազմում է 31 հազար մարդ: Իհարկե, 31 հազարն էլ ճիշտ արտագաղթողների թիվը չէ, կարող է 5-ով, 10-ով, 15-ով տարբերություն լինել, բայց հավաստի թիվ է, և այդ թիվն էլ, իհարկե, մեծ թիվ է, մեծ է, որովհետև մենք ընդամենը 3 միլիոն ենք մեր երկրում ապրող: Եթե մենք լինեինք գոնե 10 միլիոն, 12, 15 միլիոն, դա որևէ մտահոգության առարկա լինել չէր կարող: Մյուս կողմից՝ 31 հազարն այն թիվը չէ, որի դեմ հնարավոր չլինի պայքարել, նվազեցնել ու այնուհանդերձ գալ ներգաղթին: Մենք անպայման դրան հասնելու ենք: Բայց, նորից եմ ասում, առավել ևս այս լսարանի համար պետք է հասկանալի լինի, որ պրոբլեմը չի դադարում պրոբլեմ լինելուց, եթե դու դադարում ես խոսել դրա մասին»,- պատասխանելով համագումարի մասնակիցներից մեկ հարցին, հայտարարել է Սերժ Սարգսյանը:

Նախ հետաքրքիր է, թե Սերժ Սարգսյանն ինչու չի կարեւորել Ավագյանի նշած «հավելաճը» եւ այդ մասին ոչինչ չի ասում համագումարում:

Երկրորդ՝ նույն Սերժ Սարգսյանը, ի տարբերություն, իր կրտսեր կուսակցի, 31 հազարը մեծ թիվ է համարում:

Ինչեւէ, երկիրը դատարկող իր առաջնորդին պաշտպանելու համար գլխապատառ ասպարեզ նետվելուց ու ստատուս գրելուց առաջ, Կարեն Ավագյանին չէր խանգարի ուշադիր ծանոթանալ ԵԿՄ համագումարում տեղի ունեցած Սերժ Սարգսյանի «ասուլիսի» տեքստին և անհարմար վիճակի մեջ չդնել «Վերջի բոլշևիկին»:

Կիմա Եղիազարյան