Լրահոս

01.10.2012 20:01


ՄԻ ՓՈՇԻԱՑՐԵՔ ՄԵՐ ՀԱՎԱՏԻ ՄՆԱՑԱԾ ՀԱՏԻԿՆԵՐԸ

ՄԻ ՓՈՇԻԱՑՐԵՔ ՄԵՐ ՀԱՎԱՏԻ ՄՆԱՑԱԾ ՀԱՏԻԿՆԵՐԸ

ՀՅԴ անդամ, ԱԺ նախկին պատգամավոր Լիլիթ Գալստյանը ֆեյսբուքյան իր էջում «ՄԻ ՓՈՇԻԱՑՐԵՔ ՄԵՐ ՀԱՎԱՏԻ ՄՆԱՑԱԾ ՀԱՏԻԿՆԵՐԸ» վերտառությամբ գրառում է կատարել՝ նշելով.

«Խորհրդարանում չեմ։ Լսում եմ Օսկանյան-ՀՀ դատախազ-ԱԺ պատգամավորներ հարցուպատասխան-ելույթներն ու ամոթի, փոքրության ու վիրավորանքի զգացումից խեղդվում եմ։ Վիրավորվում եմ նախ պետության նկարագրի ու բարոյականության համատեքստում։ Որքան կարող ենք արժեզրկել մեր քաղաքական ինստիտուտներն ու դատաժամ հեռուստաշոու հիշեցնող այս ֆարսը բերել հասցնել երկրի գլխավոր քաղաքական ամբիոն։ 
Հազար ու մի տագնապներ ու մարտահրավերներ ապրող մեր երկրում մի՞թե այլ հարց չկար։ Միթե՞ սրանք են այն հարցերը, որ պիտի ուղղվեին ՀՀ արտաքին գերատեսչությունը տասը տարի ղեկավարած անձին։ 

Վեց ժամ շարունակ փորփրվում են Օսկանյանի սավանների մեջ՝ պարզելու 180 000 դոլարի շարժը, այն դեպքում, երբ այդ նույն խորհրդարանի որոշ անդամներ այդքան և ավելի գումարներ կազինոներում մեկ օրում են կորցնում կամ միմյանց հարսանեկան նվեր-քծնանքներ բաժանում։ Ամոթ է, ճղճիմ… Որքան կուզեի այդ պահին նայել որոշների դեմքին… Մի՞թե խորհրդարանի սպիտակ ձեռնոցներով ընտրյալների՚ շարքում հենց Օսկանյանն է փողեր լվացողն ու դատաքննական գործընթացը խոչընդոտող տեսակը։ Ուշքի եկեք.... ինչ հեշտ է գործիք դառնալը


Օսկանյանին հարցեր արժե տալ՝ նույնիսկ պետք է, բայց դրանք միայն ու միայն քաղաքական հարցեր են, որոնք քաղաքական պատասխանատվություն են ենթադրում, ընդ որում ավելի լայն մարդկանց շրջանակ ենթադրող։ 

Այո՝ քաղաքական պատասխանատվություն։ Մի բան, որ երբեք չի եղել մեր իրականության մեջ։ Բայց ոչ քրեական հետապնդում, մահակ քաղաքական մոտիվներով։ Մեր երկրում ի վերջո մի օր անկախ դատաիրավական համակարգ պիտի լինի, թե այն իբրև պատժամիջոց ու ռեպրեսիվ գործիք պիտի կախվի անհարմարություններ ստեղծողների գլխին։ Ցավոք, երեք նախագահների օրոք էլ քաղաքական ենթատեքստով քրեական հետապնդումները կենսունակ են եղել, վարքականոն։ ԱՎԱՆԴՈՒՅԹ..... մենք էլ չհավատալու, կասկածելու, էս ձեռագրից զզվելու իրավունքն ունենք։ 
Պարոնայք՝ ճշմարտությունն ու արդարադատությունը հարաբերական արժեքներ չեն՝ ըստ պահի կոնտեքստի։
Մի փոշիացրեք մեր հավատի մնացած հատիկները։ Ուշքի եկեք.... գոնե ի սեր պետության վարկի…»։

7or.am

Այս խորագրի վերջին նյութերը