«Ռոյթերս» գործակալության հաղորդմամբ՝  YouTube-ը չի արգելափակելու սկանդալային «Մուսուլմանների անմեղությունը» ֆիլմի բաց ցուցադրությունը։ Որպես հիմնավորում՝ նշվում է, թե ֆիլմը չի խախտում վիդեոհոսթինգի կողմից սահմանված որևէ կանոն։ 

Ավելի վաղ ֆիլմը արգելափակել էին Հնդկաստանի, Ինդոնեզիայի, Լիբիայի և Եգիպտոսի համար: Առաջին երկու երկրներում ֆիլմը համարել են տեղի օրենքների խախտում, իսկ մյուս երկրներում այն արգելափակվել է` հուզումներից և բախումներից խուսափելու համար:

Հիշեցնենք, որ սեպտեմբերի 11-ին անհայտ անձինք նռնականետերից գնդակոծել էին Լիբիայի Բնեգազի քաղաքում ԱՄՆ հյուպաթոսության շենքը: Զոհվել էր Լիբիայում ԱՄՆ դեսպան 52-ամյա Քրիս Սթիվենսը, դեսպանատան տեղեկատվական դեպարտամենտի աշխատակիցը և պետքարտուղարության 2 աշխատակից: Նշվում էր, որ կատարվածը պատասխան է «Մուսուլմանների անմեղությունը» ֆիլմին, որն անարգում է Մուհամեդ մարգարեին անունն ու վիրավորում մահմեդականների կրոնական զգացմունքները։ Իրենց հերթին ԱՄՆ իշխանությունները նողկալի էին անվանել ֆիլմը, սակայն ընդգծել, որ որևէ կինոնկար չի կարող բռնության համար արդարացում ծառայել։