Վալերի Բրյուսովի անվան լեզվաբանական համալսարանի նախկին ռեկտոր Սուրեն Զոլյանն այսօր հրավիրված մամլո ասուլիսին հայտնել է, որ նա շարունակում է պայքարել իր պաշտոնանկման վերաբերյալ ԿԳՆ ապօրինի որոշման դեմ։ Նա հայտնել է, որ վաղը տեղի է ունենալու իր գործով դատական նիստ ու ավելացրել.

– Հիշո՞ւմ եք, որ պարոն Աշոտյանը «Ֆեյսբուք»–ում հայտարարում էր, որ անօրինականություններ է հայտնաբերել մեր համալսարանում: Ես հիմա իրենց տվել եմ հնարավորություն։ Վաղը արդեն պարզ կլինի՝ պարոն Աշոտյանը պետական ա՞յր է, թե սովորական խաբեբա։

Զոլյանն ընդգծել է նաև, որ փորձում են իրեն հարկադրել, որ հեռանա Հայաստանից։ ԵՊԼՀ նախկին ռեկտորը նշել է, որ եվրոպական տարբեր համալսարաններից հրավերներ է ստացել, սակայն դեռ շարունակելու է մնալ Հայաստանում ու պայքարել իր դեմ իրագործած անարդարության դեմ.

– Սա ասում եմ ի գիտություն պարոն Աշոտյանի, որ ինձ այստեղ ոչ մի պաշտոնի առաջարկ չեն արել։

Հիշեցնենք, որ կրթության և գիտության նախարար Արմեն Աշոտյանի հրամանով (հիմնավորումը՝ առանց նախարարի թույլտվության ՀՀ-ից բացակայելու համար) Սուրեն Զոլյանը աշխատանքից ազատվել է ապրիլի 17-ին, որից հետո՝ այս տարվա հունիսի 12-ին, բուհի ռեկտոր է ընտրվել Գայանե Գասպարյանը:

7or.am