Իրանի փոխնախագահ Մոհսեն Մանսուրին հայտնել է, որ նախագահ Էբրահիմ Ռայիսիին տեղափոխող ուղղաթիռի կոշտ վայրէջքից հետո նրան ուղեկցող երկու անձինք մի քանի անգամ կապ են հաստատել։

«Արմենպրես»- ի հաղորդմամբ՝ ինչպես փոխանցում է IRNA-ն, Իրանի փոխնախագահը տեղեկացրել է նաև, որ պատվիրակությունը թռել է երեք ուղղաթիռով, սակայն նախագահին տեղափոխող ուղղաթիռի և մյուս երկուսի միջև կապը կտրվել է:

Նրա խոսքով՝ այդ երկուսը սկսել են անհետացած ուղղաթիռի որոնումները։

«Ուղղաթիռի ուղևորներից մեկը և նրա անձնակազմից կապ են հաստատել, ինչը վկայում է այն մասին, որ աղետի չափն այնքան էլ լուրջ չէ»,-ասել է Մանսուրին՝ հավելելով, որ արտակարգ դեպքի վայր են ուղարկվել Կարմիր մահիկի և բանակի, Իսլամական հեղափոխության պահապանների կորպուսի փրկարարական ջոկատները:

***

Իրանի Իսլամական հեղափոխության պահապանների կորպուսի Արևելյան Ատրպատականի կորպուսի հրամանատարը հայտարարել է Իրանի նախագահ Էբրահիմ Ռայիսիի ուղղաթիռի կոշտ վայրէջքի ճշգրիտ վայրը պարզելու մասին:

«Արմենպրես»-ի հաղորդմամբ՝ Tasnim-ին տված հարցազրույցում Սարդար Աբասկուլիզադեն, որը ղեկավարում է որոնողական գործողությունը, ասել է. «Մի քանի րոպե առաջ ազդանշան է ստացվել դեպքի վայրում գտնվող ուղղաթիռից և անձնակազմի անդամի բջջային հեռախոսից»:

Նա նշել է, որ այս պահին իրենք ամբողջ զինված ուժերի հետ մեկնում են տարածաշրջան՝ հավելելով. «Հուսով եմ, որ լավ լուր կհասցնենք մարդկանց»:

Սարդար Աբբասղուլիզադեհն հայտարարել է, որ զինված ուժերի 30 տոկոսը ներկա է դեպքի շրջանում, և հավելել, որ բանակի բոլոր մարդկային ռեսուրսներն ու տեխնիկան տեղափոխվել է այդ վայր, այնպես որ որոնողական գործողությունը շուտով կավարտվի։