Փարիզը քաղաք է, որը սիրում են նրբաճաշակ սննդի, արվեստի և նորաձևության համար: Սակայն Ճամփորդության և զբոսաշրջության համաշխարհային խորհրդի (WTTC) նոր ինդեքսը նաև հաստատում է, որ Փարիզը զբոսաշրջության համար աշխարհի ամենաազդեցիկ քաղաքն է, հայտնում է CNN-ը:

WTTC-ը՝ Մեծ Բրիտանիայում գործող զբոսաշրջային արդյունաբերության ոչ առևտրային կազմակերպությունը, վերլուծել է զբոսաշրջության մասին 2022 թվականի տվյալները, որպեսզի որոշի, թե որտեղ են ճանապարհորդներն ամենաշատ գումար ծախսում:

Սակայն զբոսաշրջային «ամենահզոր» քաղաքների ընդհանուր ցանկը հաշվի է առել ոչ միայն թանգարանների տոմսերն ու հյուրանոցների արժեքը։ Մյուս գործոնը եղել է այն, թե որքան են տեղական և ազգային կառավարությունները և ձեռնարկությունները ներդրումներ կատարում այս քաղաքներում որպես զբոսաշրջային ուղղություններ:

Օրինակ՝ ցուցակը գլխավորող Փարիզը պատրաստվում է ընդունել 2024 թվականի ամառային Օլիմպիական խաղերը։ Թեև խաղերի անցկացման վայրերի 5%-ից պակասը կկառուցվի, քաղաքը ռեսուրսներ է ներդնում ենթակառուցվածքների, անվտանգության մեջ և այլ միջոցառումներ է նախաձեռնում: Ըստ այդ հաշվարկների՝ Ֆրանսիայի մայրաքաղաքում զբոսաշրջության ընդհանուր ծավալը կազմել է 35,6 մլրդ դոլար։

Չինաստանի երեք քաղաքներ՝ Պեկինը, Շանհայը և Գուանչժոուն, նույնպես հայտնվել են 2022 թվականի լավագույն տասնյակում: Ընդ որում՝ Պեկինը երկրորդ տեղում է հայտնվել։

Չինաստանը մեծ ներդրումներ է կատարել զբոսաշրջության մեջ և այժմ, երբ նրա սահմանը կրկին բացվել է, գովազդում է այն օտարերկրյա ճանապարհորդների համար: Մակաոն Չինաստանի միակ քաղաքն է, որտեղ թույլատրված են մոլախաղերը, և զբոսաշրջիկների մեծամասնության համար ավելի հեշտ է այնտեղ հասնել առանց վիզայի, ի տարբերություն մայրցամաքի: WTTC-ն կանխատեսում է, որ մինչև 2032 թվականը Չինաստանը կգերիշխի իր վարկանիշում:

«Խոշոր քաղաքները, ինչպիսին են Լոնդոնը, Փարիզը և Նյու Յորքը, կմնան համաշխարհային կենտրոններ, բայց առաջիկա մի քանի տարիների ընթացքում Պեկինը, Շանհայը և Մակաոն կբարձրանան լավագույն քաղաքների ցուցակում»,-ասել է WTTC-ի նախագահ և գլխավոր տնօրեն Ջուլիա Սիմփսոնը:

Տասնյակում են հայտնվել նաև ամերիկյան Օռլանդո, Նյու Յորք և Լաս Վեգաս քաղաքները։ Թեև յուրաքանչյուր քաղաք զգալի գումար է վաստակում զբոսաշրջությունից, նրանք սպասարկում են բազմաթիվ ճանապարհորդների։ Օռլանդոն հայտնի է քաղաքի թեմատիկ այգիներ այցելող ընտանիքներով, Լաս Վեգասը մոլախաղերի և գիշերային կյանքի աշխարհահռչակ կենտրոն է, իսկ Նյու Յորքը գրավում է համադամասերներին և արվեստի սիրահարներին։

Տոկիոն, Մեխիկոն և Լոնդոնը զբաղեցրել են համապատասխանաբար յոթերորդ, ութերորդ և իններորդ տեղերը:

Ինչ-որ առումով նույնքան հետաքրքիր էր տեսնել, թե ովքեր չեն հայտնվել ցուցակում:

Երկու զարմանալի բացթողումներ են եղել Մերձավոր Արևելքում, որի ժողովրդականությունը կտրուկ աճել է վերջին տասնամյակի ընթացքում: Թեև շքեղ Դուբայը և Աշխարհի գավաթը հյուրընկալող Դոհան գլխավորել են զբոսաշրջության ամենամեծ եկամուտների ցուցակը, սակայն մյուս անվանակարգերում նրանք այնքան էլ լավ արդյունքներ չեն ունեցել և չեն հայտնվել առաջին տասնյակում:

Ամստերդամը, Բարսելոնան և Սինգապուրը նույնպես դարձել են նույն երևույթի զոհերը, որոնք բարձր գնահատականներ են ստացել այցելուների ծախսած գումարի համար, բայց չեն ներառվել «ամենաազդեցիկների» ընդհանուր ցուցակում։

Աղբյուրը՝ news.am