«Ժառանգություն» կուսակցության հիմնադիր նախագահ Րաֆֆի Հովհաննիսյանը  «Հայացք» ակումբում հրավիրված մամուլի ասուլիսի ժամանակ ասել է, որ հայ-թուրքական սահմանի բացման և դիվանագիտական հարաբերությունների վերաբերյալ փաստաթղթի ստորագրումը գոնե մոտ ապագայում չի ակնկալում, բայց հայաստանյան իշխանություններից ակնկալում է հետևյալը.

-Ակնկալում եմ, որ Հայաստանի  իշխանությունը վերջապես հասկանա պահի լրջությունը և այն իրավական, հանրային մանդատը, որ նա չստացավ ընտրությունների միջոցով, գոնե իր  քայլերի միջոցով կարողանա փաստարկի, որ ինքը ներկայացնում է հայ ժողովրդի քաղաքացիական զանգվածի և ազգի շահերը։

Անդրադառնալով ՄԱԿ-ի անվտանգության խորհրդի անդամ դարձած Թուրքիայի վարչապետի այն հայտարարությանը, թե ուզում է այնտեղ Հայաստանը տեսնել որպես «օկուպանտ»՝  Ր. Հովհաննիսյանն ասել է, որ հասունացել է պահը, երբ Հայաստանը պիտի կարողանա իր դիրքը ապահովել։

-Պարզ է, որ դա կարող ենք առավելագույնս կատարել, երբ ունենանք մի իշխանություն, որը իրավական է, օրինական է և վայելում է  ժողովրդի աներկբա վստահությունը և հավատը,- ասել է Ր. Հովհաննիսյանը։