«Беларусь сегодня»–ն հրապարակել է հայ ուղևորի պատճառով օդանավակայան վերադարձած «Բելավիա» ավիաընկերության ինքնաթիռի օդաչուի և ուկրաինացի ավիակարգավարի խոսակցությունը։ Այս մասին հայտնում է «lenta.ru»-ն:

Երբ հոկտեմբերի 21-ին ինքնաթիռը դուրս է եկել Կիևի Ժուլյանի օդանավակայանից, ավիակարգավարը հայտնել է օդանավի հրամանատարին, որ ինքնաթիռը պետք է հետ վերադառնա՝ սպառնալով չկատարման դեպքում ռազմական ավիացիա բարձրացնել։

Օդաչուն հետաքրքրվել է, թե ինչ է տեղի ունեցել, սակայն կարգավարը պատասխանել է. «Չեմ կարող հաղորդել: Ժամանման ժամանակ ամեն ինչ կիմանաք»:

Այնուհետև վերծանված տեքստում բերվում են օդանավում անձնակազմի անդամների խոսակցությունները և օդաչուների ենթադրությունները։

««Բելավիա-840», խոսում է թռիչքների ղեկավարը: «Ժուլյանի» օդանավակայան ձեր վերադարձի մասին տեղեկությունը ստացվել է ռազմական ղեկավարությունից: Ձեզ ավելի մանրամասն տեղեկություն կհաղորդվի վայրէջքից հետո»,–հավելել է կարգավարը։

Օդանավում 136 ուղևոր և անձնակազմի 6 անդամ է եղել։

Վայրէջքից հետո իրավապահներն օդանավից դուրս են բերել Հայաստանի Հանրապետության քաղաքացու։ Վերալիցքավորումից հետո օդանավը մեկնել է Մինսկ և բարեհաջող վայրէջք կատարել։

«by24.org»–ի փոխանցմամբ՝ ՀՀ քաղաքացու ազգանունը Մարտիրոսյան է։ Ուկրաինայի հատուկ ծառայությունները նրան հետախուզման մեջ գտնվող հանցագործի հետ են նույնացրել։ Ավելի ուշ անվտանգության ծառայության աշխատակիցները նրանից ներողություն են խնդրել և թույլ տվել մեկնել Մինսկ։

7or.am