ՌԴ նախագահ Դմիտրի Մեդվեդևը ստորագրել է Մոսկվայի քաղաքապետ Յուրի Լուժկովի պաշտոնաթողության հրամանը։ «Ժամկետից շուտ Մոսկվայի քաղաքապետի լիազորությունների դադարեցման մասին» հրամանագիրը, որը ստորագրվել է սեպտեմբերի 28-ի առավոտյան, անմիջապես ուժի մեջ է մտել։ Լուժկովն իր պաշտոնից զրկվել է նախագահի վստահությունը կորցնելու հետևանքով։ Յուրի Լուժկովը Մոսկվայի քաղաքապետի պաշտոնում է նշանակվել 1992թ. Բորիս Ելցինի հրամանգրով։ Նա այդ պաշտոնում վերընտրվել է երեք անգամ։

Երեկ «Բարգավաճ Հայաստան» կուսակցությունը որոշում կայացրեց Ազգային ժողովի առաջիկա նիստում ՀՀ ԱԺ փոխնախագահի պաշտոնում առաջադրել Սամվել Բալասանյանին։ ՕԵԿ-ը կո՞ղմ է քվեարկելու Ս. Բալասանյանի թեկնածությանը և ընդհանրապես ինչպե՞ս են վերաբերվում ԲՀԿ-ի կողմից ԱԺ փոխնախագահի պաշտոնում հենց նրան առաջադրելու փաստին, «Օրինաց երկիր» խմբակցության ղեկավար Հեղինե Բիշարյանը «7օր»-ին ասել է, որ իրենք հինգշաբթի հերթական քաղխորհրդի նիստ են հրավիրելու և դրանից հետո միայն այդ հարցերի պատասխանները կտրվեն։