Այսօր ԱՄՆ միլիոնավոր քաղաքացիներ կմասնակցեն ԱՄՆ Կոնգրեսի միջանկյալ ընտրություններին։ Նրանց ձայների համար պայքարում են կոնգրեսականներ և սենատորներ մրցակցող երկու հիմնական՝ Դեմոկրատական և Հանրապետական կուսակցություններից։ Մասնագետները կանխորոշում են իշխող Դեմոկրատական կուսակցության պարտությունը։ Նրանց կարծիքով՝ ամբողջ հարցն այն է, թե որքան մեծ կլինի պարտությունը։ Մինչդեռ նախագահ Բարաք Օբամայի կարծիքով՝ եթե Կոնգրեսում հաղթեն Հանրապետականները, ԱՄՆ-ը հետ կգնա։

Սոցիալական ցանցերում տեղեկություն էր տարածվել, թե նոյեմբերի 2-4-ը Հայաստանում կանցկացվի ադրբեջանական ֆիլմերի փառատոն «Խաղաղարար նախաձեռնությունների կովկասյան կենտրոնի» նախաձեռնությամբ (նախագահ' Գեորգի Վանյան) և Հայաստանում ամերիկյան դեսպանատան աջակցությամբ։ Ավելի ուշ, սակայն, կազմակերպիչների կայքում տեղեկություն էր տեղադրվել, թե փառատոնի անցկացումը հետաձգվում է։ ՀՀ–ում ԱՄՆ դեսպանատնից «7օր»-ին ասել են, որ դեսպանատան հրավիրատոմսում որպես ամսաթիվ նշված է նոյեմբերի 12-ը։

Հմաշխարհային տնտեսական ֆորումը հրապարակել է «Գլոբալ մրցունակություն 2010-2011» զեկույցը։ Մրցունակության վարկանիշով, դիտարկված 139 երկրների մեջ, Հայաստանը 98-րդ տեղում է, Ղազախստանը՝ 72-րդ, Ուկրաինան՝ 89-րդ, Մոլդովան՝ 94-րդ, Տաջիկիստանը՝ 116-րդ, Ղրղզստանը՝ 90-րդ։ ԱՊՀ երկրների ցանկում, ըստ զեկույցի, Ադրբեջանը մրցունակության վարկանիշով առաջ է անցել 63-րդ տեղում գտնվող Ռուսաստանից։ Նախկին Խորհրդային հանրապետություններից Էստոնիան զբաղեցրել է 33-րդ տեղը, Լիտվան՝ 47-րդ, Վրաստանը՝ 90-րդ։

Միջազգային լրատվամիջոցներն ահազանգում են Հոնդուրասում տեղի ունեցած ամենադաժան և լկտի մասայական սպանություններից մեկի մասին։ Ֆուտբոլային խաղի ժամանակ հանցագործները ներխուժել են խաղադաշտ և սառնասրտորեն գնդակահարել են բոլոր մարզիկներին։ Ողբերգությունը տեղի է ունեցել Սան-Պեդրո-Սուլա քաղաքում։ Ենթադրվում է, որ հանցագործությունը իրականացրել են Mara 18 («Մարտի-18») գանգստերական խմբավորման անդամները։ Հանցագործության դրդապատճառներն առայժմ հայտնի չեն։