Թիվ 10 ընտրատարածքում առաջադրված պատգամավորի թեկնածու Վլադիմիր Կոստանյանը նույն ընտրատարածքի պատգամավորության թեկնածուներին առաջարկել է միասնաբար ինքնաբացարկ հայտարարել, որպեսզի հավելյալ հնարավորություն ստեղծվի Նիկոլ Փաշինյանի՝ 10-րդ ընտրատարածքում լրացուցիչ ընտրություններին մասնակցելու համար։

«Սրանով մենք նաև ցույց կտանք, որ մեզանից որևէ մեկն «իշխանական պրոյեկտ» չէ. կեղծ ձևով չի ներկայանում ժողովրդին»,- մասնավորապես նշված է Վ. Կոստանյանի հայտարարությունում։

Թիվ 10 ընտրատարածքում պատգամավորության թեկնածու է առաջադրվել նաև Հայաստանի քաղաքագետների միության նախագահ Հմայակ Հովհաննիսյանը։ Վ. Կոստանյանի առաջարկը նա չի ցանկացել մեկնաբանել՝ «7օր»-ին ասելով, որ լուրջ չի վերաբերվում նրան։

-Մի օր մի բան է ասում, մյուս օրը 180 աստիճանով հակառակ բանն է ասում։ Մի՞թե սա քննարկման արժանի լուրջ դեմքի վարքագիծ է։ Իհարկե ո՛չ,- «7օր»-ին ասել է Հ. Հովհաննիսյանը։

7or.am