Մեկնաբանելով հայ-թուրքական արձանագրությունների ստորագրման փաստը՝ «Հայկական ընտրություն» կուսակցության նախաձեռնող խմբի անդամ Արմեն Աղայանը «7օր»-ին ասել է, որ, որպես ստեղծված իրավիճակից ցանկալի ելք, տեսնում է իշխանափոխությունը։

-Ով հնարավորություն ունի իշխանափոխության ուղղությամբ աշխատելու, նա պարտավոր է դա անել,- ասել է Ա. Աղայանը՝ հավելելով, որ Հայաստանի և Թուրքիայի միջև ստորագրված արձանագրություններն իր համար որևէ արժեք չեն ներկայացնում.

-Հայաստանի վարչակարգն ինչ-որ մի թուղթ է ստորագրել Թուրքիայի հետ, և ես համոզվածեմ, որ Հայաստանի կամ հայ ժողովրդի հետ այդ թուղթը որևէ առնչություն չունի։ Այն ինձ և, համոզված եմ, մնացած բոլոր նորմալ մարդկանց համար անվավեր, անիմաստ փաստատթուղթ է։ Ինչ վերաբերում է կոնկրետ ստորագրությանը, ապա կարծում եմ, որ արդեն բոլորի համար պարզ դարձավ, թե իրականում դա ի՞նչ գործընթացների մաս է։ Հայտարարություններով հանդես չգալը և այն բացատրությունները, թե ինչո՞ւ դրանք չեղան, վկայում են, որ հայ-թուրքական գործընթացը սահման բացել-փակելով չի ավարտվում, և այնտեղ ենթադրվում են շատ ավելի էական զիջումներ նույնպես։ Եթե հիշենք թուրք արտգործնախարարի հրճվանքը և մեր արտգործնախարարի դեմքի տխուր արտահայտությունը, կարելի է նաև պատկերացնել, որ մեր իշխանությունները նույնպես կամաց-կամաց գլխի են ընկնում, թե ի՞նչ ճակատագրական սխալներ են գործում։ Հուսով եմ, որ ապագա իրադարձություններն անվավեր կդարձնեն այդ գործընթացը նաև այս վարչակարգի տեսակետից։

7or.am