Վրաստանի նախագահ Միխայիլ Սահակաշվիլիի գլխավորած «Միացյալ ազգային շարժում» կուսակցությունը նախագահական ընտրությունների իր թեկնածուին կորոշի ներկուսակցական նախնական ընտրությունների միջոցով։ Լրագրողներին այդ մասին հայտնել է «Ազգային շարժում» խորհրդարական խմբակցության ղեկավար Դավիթ Բաքրաձեն: Բաքրաձեն թեկնածուների անունները նշելուց ձեռնպահ է մնցել՝ ասելով, թե դա հայտնի կդառնան գրանցվելուց հետո: Ենթադրաբար հունիսի վերջին մեկնարկելիք ներկուսակցական նախնական ընտրությունների շրջանակներում անց կկացվեն տարածքային մարզային համաժողովներ թեկնածուների միջև թեմատիկ բանավեճերի տեսքով, որից հետո կայացվելիք քվեարկությունն էլ կորոշի հաղթողին:

Նա հայտարարել է. «Մենք ցանկանում ենք վրացական քաղաքական մշակույթում ներդնել նոր չափանիշ, ըստ որի կուսակցական թեկնածուն ընտրվում է ոչ թե մեկ մարդու ցանկությամբ, ինչպես մեր մրցակից կուսակցություններում է, այլ բաց և թափանցիկ հրապարակային գործընթացով»:

Նշենք, որ ներկուսակցական նախնական ընտրությունների մասին ապրիլին խոսել էր նաև Սահակաշվիլին, սակայն երբ կուսակցության գլխավոր քարտուղար Վանո Մեհրաբիշվիլին ձերբակալվել էր, նախնական ընտրությունների անցկացման նպատակահարմարությունը կասկածի տակ էր առնվել: