Աղմուկ հանած «ՖԵՄԵՆ» հայտնի շարժումը փորձել է ներխուժել  Ուկրաինայի խորհրդարան՝ Գերագույն ռադա, նախքան կսկսվեր յոթերորդ գումարման Ռադայի առաջին նիստը։               

Աղջիկներից մի քանիսին բռնել են Գերագույն ռադայի  կենտրոնական մուտքի մոտ և տարել ոստիկանության բաժին: Որոշ տվյալներով՝ ակտիվիստները փորձել են խորհրդարան ներխուժել զանգվածային լրատվամիջոցների համար նախատեսված մուտքով:

Այդ խուլիգանական արարքից հետո  խորհրդարանի անվտանգության ծառայությունը փակել է շենքի բոլոր մուտքերը: Մոտ  10 րոպե  պատգամավորներ Սերգեյ Կիվալովը, Վասիլի Պետևկան և Պավել Բալոգը   չեն կարողացել մտնել Գերագույն Ռադա: Չի կարողացել մտնել նաև Ռուսաստանի դեսպան Միխայիլ Զուրաբովը:

«ՖԵՄԵՆ» շարժման մասնակիցներն իրենց գործողություններով  հայտնի են ոչ միայն Ուկրաինայում, այլ նաև Ռուսաստանում և Եվրամիության երկրներում: Բոլորովին վերջերս Փարիզում իրենք միջոցառում են անցկացրել՝ նվիրված միասեռ ամուսնությունները  թույլատրող  օրենքին: Այդ գործողությունները վրդովեցրել են կաթոլիկներին, որոնք հենց այնտեղ էլ բողոքի գործողություններն են անցկացրել հենց այդ օրենքի դեմ: Ավելի  վաղ Կիևում «ՖԵՄԵՆ» –ները խաչերը սղոցել են ի նշան համերաշխության «Փուսի Ռիոթ» խմբի հետ:

Իրենց բոլոր գործողությունները «ՖԵՄԵՆ»–ները կատարում են մինչև գոտկատեղը մերկ վիճակում: