Իսրայելի վարչապետ Բենիամին Նաթանյահուն հայտարարել է, որ երկրում արտահերթ խորհրդարանական ընտրություններ կկյանան: Որպես պատճառ՝ Նեթանյահուն նշել է  իշխող կոալիցիայում տարաձայնությունները, որոնք վերաբերում են բյուջետային ծախսերի կրճատմանը: Այս մասին տեղեկացնում է «Ռոյթերս»–ը։

Ընտրությունները տեղի կունենան 2013թ. հունվարին կամ փետրվարին։ Քնեսեթի հերթական ընտրությունները  նախատեսված էին 2013թ. հոկտեմբերին: Ըստ փորձագետների` Նաթանյահուն  խորհրդարանական ընտրությունների ամսաթիվը փոխել է, որպեսզի ընդդիմությանը  հնարավորություն չտա քաղաքական միավորներ հավաքել: Տվյալ պահին հասարակական կարծիքի հարցումները հաղթանակը տալիս են վարչապետի գլխավորած  «Լիկուդ» կուսակցությանը։

Հիշեցնենք, որ ամռանը Նաթանյահուն զրկվել էր  քաղաքական գլխավոր դաշնակիցներից մեկից. իշխող կոալիցիայից դուրս էր եկել կենտրոնական  «Քադիմա» կուսակցությունը: Այժմ վարչապետի կուսակցությունը խորհրդարանական մեծամասնություն է կազմում` Քնեսեթի   120 տեղից զբաղեցնում է 66-ը: