Պաղեստինա-իսրայելական խաղաղության գործընթացը «կլինիկական մահվան» վիճակում է: Նման հայտարարությամբ է հանդես եկել Պաղեստինի ազգային վարչակազմի ղեկավար Մահմուդ Աբասը՝ ստեղծվածի պատասխանատվությունը դնելով Իսրայելի վրա: Այս մասին տեղեկացնում է «ԻՏԱՌ–ՏԱՍՍ»–ը։

Աբասն ասել է, որ պաղեստինյան կողմը կատարել է միջազգային համաձայնագրերով ստանձնած իր բոլոր պարտավորությունները.

–Գնդակն այժմ իսրայելական կողմում է:

Բացի այդ, Պաղեստինի ղեկավարը Իսրայելին մեղադրել է այն բանի համար, որ նրա բնակավայրերի շինարարության քաղաքականությունը խաթարում է երկու պետությունների համատեղ շահերի վրա համաձայնագրի հասնելու սկզբունքը:

Աբասը հայտարարել է, որ պաղեստինցիները հակված են բանակցությունների ճանապարհով խաղաղության հասնելուն.

–Դա պետք է հանգեցնի 1967թ. սահմաններով Պաղեստինի պետության լիակատար ճանաչմանը:

Հիշեցնենք. ավելի վաղ Մահմուդ Աբասը նամակ էր հղել Իսրայելի վարչապետ Բենյամին Նաթանյահուին՝ իր պայմաններն առաջարկելով խաղաղության բանակցությունների վերսկսման համար: Ի պատասխան՝ Նաթանյահուն կոչ էր արել առանց նախապայմանների վերադառնալ բանակցությունների սեղանի շուրջը: