Հունվարի 19-ին ՄԱԿ-ի Անվտանգության խորհրդում Հարավային Աֆրիկայի նախագահությամբ տեղի է ունեցել քննարկում` նվիրված օրենքի գերակայության թեմային, որի ընթացքում ելույթով հանդես է եկել ՄԱԿ-ում ՀՀ մշտական ներկայացուցիչ դեսպան Կարեն Նազարյանը:

Նա իր խոսքում նշել է, որ Հայաստանը կարևորում է օրենքի գերակայության խրախուսումը միջազգային խաղաղության ու անվտանգության պահպանման ու ամրապնդման և մարդու իրավունքների պաշտպանության տեսանկյունից, քանի որ դրանց, ու մասնավորապես, ժողովուրդների ինքնորոշման իրավունքի ոտնահարումը հանգեցնում է տարածաշրջանային հակամարտությունների:

Կարեն Նազարյանը նաև նշել է, որ իր հերթին միջազգային հումանիտար իրավունքի պահպանումը կարևոր է օրենքի գերակայությունն ապահովելու համար ինչպես հակամարտության, այնպես էլ հետկոնֆլիկտային իրավիճակներում, ու վերհաստատել, որ այս համատեքստում առանձնակի ուշադրություն պետք է դարձնել քաղաքացիական բնակչության պաշտպանության հիմնախնդիրներին:

Դեսպան Նազարյանն անդրադարձել է նաև անպատժելիության հարցին ու ողջունել այն փաստը, որ ՄԱԿ-ի ԱԽ-ը շարունակում է իր գործունեության կենտրոնում պահել պետությունների պատասխանատվությունն անպատժելիությանը վերջ տալու, ցեղասպանությունների ու մարդկության հանդեպ հանցագործություններ գործած անձանց նկատմամբ հետաքննություն վարելու ու պատասխանատվության ենթարկելու հարցերը:

Իր ելույթի մեկ այլ հատվածում Կարեն Նազարյանն ԱԽ անդամների ուշադրությունն է հրավիրել առ այն, որ օրենքի գերակայության հասկացությունը մերժում է ուժով կառավարումը և ուժի կիրառումը` հավելելով, որ հետկոնֆլիկտային շրջանում ուժի չկիրառման սկզբունքի պահպանումը կարևոր գործոն է կողմերի միջև փոխվստահության ամրապնդմանը, արդարությանը և անվտանգությանը միտված բարենպաստ միջավայր ստեղծելու համար:

Քննարկմանը ելույթներով հանդես են եկել նաև ՄԱԿ-ի գլխավոր քարտուղարը և կազմակերպության չորս տասնյակից ավելի անդամ երկրների ներկայացուցիչներ: