Ռուսաստանի արտաքին գործերի նախարարության պաշտոնական ներկայացուցիչ Մարիա Զախարովան հայտնել է, որ առաջին անգամ անգլերեն երգ է գրել։ Ստեղծագործությունը կոչվում էր June Song, այն կատարել է ռուս երգչուհի Լյուսյա Չեբոտինան, հայտնում է «Косомольская правда»-ն։

Դիվանագետի խոսքով՝ տեքստը գրվել է շատ վաղուց, սակայն երկար ժամանակ երգի համար հարմար կատարող չի գտել։

«Ես գիտեի, թե ինչպես կուզենայի, որ այն հնչեր… Եվ հանկարծ այս գարնանը նրանք ինձ առաջարկում են լսել այդ ձայնը, և ես հասկանում եմ, որ դա, հավանաբար, կարող է ստացվել»,-«ՌԻԱ Նովոստի»-ին ասել է Մարիա Զախարովան:

Նա պատմել է, որ նախկինում ծանոթ չի եղել Չեբոտինայի հետ։ Զախարովան գոհ է մնացել կոմպոզիցիայի դեմոտարբերակից։ Դիվանագետը նշել է, որ իրեն դուր է եկել, թե «ինչպես է երգվել և ապրվել յուրաքանչյուր նոտան»։

Աղբյուրը՝ news.am