Կարծիք

18.07.2011 13:00


Արդյո՞ք փաստը բավարար չէ պաշտոնատար անձին պատժելու համար

Արդյո՞ք  փաստը բավարար չէ  պաշտոնատար անձին պատժելու համար

Այսօր «Ժառանգություն» խմբակցության պատգամավոր Անահիտ Բախշյանը նամակով դիմել է Աշխատանքի եւ սոցիալական հարցերի նախարար  Ա. Գրիգորյանին` ներկայացնելով  ՀՀ գլխավոր դատախազի տեղակալ  Ա. Թամազյանի  նամակը` Գյումրու «Երեխաների տուն» մանկատան տնօրեն Ռուզաննա Ավագյանի կողմից 2007-2008 թվականների ընթացքում պաշտոնական լիազորությունների չարաշահման հետեւանքով ՊՈԱԿ-ին հասցված 4.093.165 դրամ էական վնաս պատճառելու մասին, որի  նախաքննությունը կատարվել է ՀՀ ոստիկանության Շիրակի մարզի քննչական բաժնում:

Պատգամավորը հարցնում է, թե  արդյոք  այս փաստը բավարար չէ  պաշտոնատար անձին պատժելու համար, կամ որքան  պետք է լինի չարաշահված գումարի չափը, որպեսզի ՀՀ-ում պաշտոնատար անձը  պատժվի:

Կից ներկայացնում ենք պատգամավորի նամակը. «Հուլիսի 9-ի «Panorama» ինտերնետային  կայքէջում հրապարակված «Եթե պաշտոնատար անձը թույլ է տվել չարաշահում` պետք է պատժվի՚ՙ»  հոդվածում բարձրացվել էր Գյումրու «Երեխաների տուն» մանկատան տնօրեն Ռուզաննա  Ավագյանի կողմից 2007-2008 թվականների ընթացքում պաշտոնական լիազորությունների չարաշահման հետեւանքով ՊՈԱԿ-ին հասցված 4.093.165 դրամ էական վնաս պատճառելու մասին հարցը, որի  նախաքննությունը կատարվել է ՀՀ ոստիկանության Շիրակի մարզի քննչական բաժնում:

Տեղեկացնում եմ Ձեզ, որ այս խնդրով  2011թ. հունիսի 22-ին նամակով դիմել եմ ՀՀ գլխավոր դատախազին եւ սույն թվականի հուլիսի 11-ին ՀՀ գլխավոր դատախազի տեղակալ, Արդարադատության պետական խորհրդական Ա. Թամազյանի ստորագրությամբ ստացել եմ պաշտոնական պատասխան, որում  ասվում է, որ Ռ. Ավագյանին մեղադրանք է առաջադրվել ՀՀ քրեական օրենսգրքի 315-րդ հոդվածի 1-ին մասով, որը կոչվում է  պաշտոնական անփութություն: Այնուհետեւ նամակում ասվում է, որ 2010թ. հունիսի 15-ի որոշմամբ քրեական գործի վարույթը կարճվել է ՀՀ Ազգային ժողովի «Համաներում հայտարարելու մասին» 2009թ. հունիսի 19-ի որոշմամբ:

Փաստորեն, իրավապահ մարմինն արձանագրել է  պաշտոնական դիրքի չարաշահում, որի արդյունքում մանկատան երեխաներին հասցվել է 4.093.165 դրամ վնաս ու այն վերականգնելու ոչ մի պարտավորություն  չի դրվել «պաշտոնական անփութություն» դրսեւորած տնօրենի վրա:

Կարելի է  տարբեր վարկածներ  փնտրել այն մասին, թե ինչպես նույն ժամանակահատվածում Գյումրու մեկ այլ մանկատան տնօրենի կողմից 1 մլն  դրամ գումարի չարաշահման արդյունքում նրան ազատել են զբաղեցրած պաշտոնից, իսկ այս տնօրենի նկատմամբ գործը ոչ միայն կարճվել, այլեւ  պետական  բյուջեի  4մլն դրամ  մսխելը որակվել  է որպես անփութություն, ու որեւէ  պատասխանատվության չենթարկվելով`  այդ քաղաքացին շարունակում է  մնալ տնօրեն: Սա  մեր անօրեն ու անարդար իրականությունն  է, նաեւ որի պատճառով երկրից արտագաղթում են մեր հայրենակիցները:

Հարգելի պարոն նախարար, լիովին համաձայն եմ Ձեզ հետ , որ եթե պաշտոնատար անձը թույլ է տվել չարաշահում, ուրեմն պետք է պատժվի, այնպես որ հասարակությունն սպասում է  Ձեր համապատասխան քայլերին, որի մասին կտեղեկանամ  10-օրյա ժամկետում`  «ԱԺ կանոնակարգ»  ՀՀ օրենքի 7-րդ կետի համաձայն»:

Այս խորագրի վերջին նյութերը