Կարծիք

09.07.2011 10:54


«Երկխոսելով» դեպի ԱԺ հերթական ընտրություններ

«Երկխոսելով» դեպի ԱԺ հերթական ընտրություններ

Հետեւելով Սերժ Սարգսյանի, նրա թիմակիցների, ինչպես նաեւ Կոնգրեսի առաջնորդների հայտարարություններին եւ վերջին գործողություններին, հասկանում ես, որ նրանք որոշել են «երկխոսելով», ամրապնդելով իշխանական կայունությունը՝ մոտենալ եւ հասնել ԱԺ հերթական ընտրություններին:

Ճիշտ է,  վերջին օրերին կոնգրեսականները եւ սերժականները միմյանց փաղաքշելուց բացի նաեւ կսմթում են, բայց դե մենք գիտենք, թե ինչու են այդպես վարվում. դա հին ու «բարի» ավանդույթ է: Ինչ որ մեկը նրանց ասել է, թե ժողովուրդը սիրում է նաեւ տեսարաններ: Բնականաբար, նրանք էլ ամեն ինչ անում են տեսարաններ ապահովելու համար: Հանրահավաք են անում: Ընդ որում, այնպիսի հանրահավաք, որ վերահսկելի հեռուստատեսությունները մի կերպ են հաջողացնում այնպես անել, որ հեռավոր Ծաղկավան գյուղի բնակիչները հասկանան, որ Ազատության հրապարակում տեղ ու դադար չի եղել: Մյուս կողմից էլ՝ լուրեր են տարածում, թե իբր հանրահավաքից առաջ ճանապարհները փակում են, որ գյուղացիները չկարողանան հասնել Երեւան: Այլ կերպ ասած, ցանկանում են ամեն ինչ անել, որ ամենավերջին միամիտները հավատան, թե Կոնգրեսը լծված է կազմաքանդման գործին: Այլ հարց է, որ հանրային կարծիքի անկախ հարցումները ցույց են տվել, որ նման լուրերին հավատում է ՀՀ քաղաքացիների ընդամենը 0.0005 տոկոսը:

Այսուհանդերձ, ամեն ինչ չէ, որ այդքան հարթ է ընթանում: Նոսրացող շարքերին ոգեւորելու համար կոնգրեսականները ստիպված են լինում դուրս գալ պայմանավորվածության շրջանակներից եւ հիշում են ավազակապետության և  արտահերթ ընտրությունների մասին, սակայն նույն այդ պայմանավորվածության շրջանակներում՝ ՀԱԿ առաջնորդը խոսում է մարտի 1-ի մասին: Դրան ի պատասխան Սերժ Սարգսյանի թիմակիցները ստիպված են լինում կոնգրեսականներին հիշեցնել, թե ով է նախաձեռնել «երկխոսությունը» եւ ում խնդրանքով: Ավելին, Սերժ Սարգսյանի թիմը ստիպված է լինում պարբերաբար հիշեցնել, թե իրենք արտահերթ ընտրություններ չեն կազմակերպելու, եւ որ բանակցություններ չեն վարելու:

Կոշտ հայտարարություններին հետեւում են նաեւ փաղաքշանքները: Ամենայն հավանականությամբ, հենց այդպես էլ նախատեսված է «երկխոսության»  պայմանավորվածություններով: Դեռ հնչում էին Գալուստ Սահակյանի ծաղրական հայտարարությունները Կոնգրեսի հասցեին, դեռ կոնգրեսականները չէին հասցրել կարգին մարսել եւ պատասխանել, երբ նրանց օգնության հասավ ԱԺ նախագահ Հովիկ Աբրահամյանը: Չմոռանանք, որ Սերժ Սարգսյանն իր հայտնի ելույթում Կոնգրեսին ուղարկել էր նաեւ Հովիկ Աբրահամյանի մոտ: Բնականաբար, Աբրահամյանն իրեն պարտավորված է զգում եւ երբեմն-երբեմն ստիպված է լինում միջամտել «երկխոսությանը»:

Հիմա նա շատ քնշորեն «երկխոսել» է Կոնգրեսի հետ: Միաժամանակ կրկին անգամ շեշտել է, թե «երկխոսոսւթյունը» վաղուց արդեն ընթանում է, եւ որ իրենք էլ շատ գոհ են: Նա ասել է, թե «երկխոսության» ներկայիս ձեւաչափն ընդունելի է իշխանությունների համար: Ամենակարեւորն այն է, որ նա ընդգծել է, թե «երկխոսոսւթյունն» առաջիկայում փոփոխության չի ենթարկվելու: Առաջին հայացքից Աբրահամյանն ասել է այն, ինչ վերջին օրերին եւ շաբաթներին ասում են մյուս ՀՀԿ-ականները: Այսուհանդերձ, պետք է ուշադրություն դարձնել «առաջիկայում» արտահայտությանը: Սա այն փրկօղակն է, որը վարչախումբը նետել է կոնգրեսին: Հիմա կախվելով այս բառից կոնգրեսի առաջնորդներն իրենց շարքերին կփորձեն ոգեւորել եւ ապացուցել, թե առաջիկայում իշխանությունները ստիպված են լինելու բանակցել իրենց հետ, եւ որ Աբրահամյանի հայտարարությունն էլ հենց այդ մասին է վկայում: Հիմա Լեւոն Տեր-Պետրոսյանը կարող է հանրահավաքում ցիտել ոչ միայն Սերժ Սարգսյանին, այլ նաեւ Հովիկ Աբրահամյանին:

Իրականությունն այն է, որ վարչախումբը մտադրություն չունի զիջումների գնալ, այն էլ Կոնգրեսի առաջ: «Երկխոսության» ձեւաչափն էլ միայն ձեւական փոփոխությունների կենթարկվի, եթե, իհարկե, ենթարկվի: Ամեն ինչ տեղավորվում է տեսարանների շրջանակում: Բարեբախտաբար, հիմա Հայաստանում այնպիսի վիճակ է, որ ՀՀ քաղաքացիների ճնշող մեծամասնությունը հասկանում է, որ թատերականացված ներկայացման է հետեւում: Այս ամենը երկրում խորացնում է բարոյալքումը եւ նպաստում արտագաղթի տեմպերի աճին: ՀՀ շարքային քաղաքացին կորցրել է հույսը վաղվա օրվա հանդեպ:

«Համերաշխ, հանդուրժող գնանք առաջ: Մենք առաջիկայում կհնչեցնենք մեր մոտեցումները, պատկերացումները երկխոսության ձեւաչափի վերաբերյալ: Մենք պատրաստ ենք ԱԺ ամբիոնը տրամադրել խնդիրների քննարկման համար. ԱԺ ամբիոնն իրոք այն ամբիոնն է, որտեղ պետք է քննարկվեն խնդիրները: Փողոցներում խոսելն արդյունք չի տալիս»,- ասել է Հովիկ Աբրահամյանը, ոգեւորելով կոնգրեսականներին:

Հիմա ոմանք հասկանում են, որ Աբրահամյանը պարզապես ասել է, թե ձեզ հանդարտ եւ համեստ պահեք եւ ձեզնից մի քանիսը պատգամավորական մանդատ կստանա: Անկասկած, սա եւս չի նշանակում, թե հենց այդպես էլ կլինի, բայց Կոնգրեսը եւ Սերժ Սարգսյանի թիմը վտանգավոր խաղ են սկսել: Վտանգավոր երկրի համար: Եւ այս իրավիճակում անխուսափելի է նոր քաղաքական դաշինքի ձեւավորումը, որն էլ վերջ կտա այս քաղաքական դաշտում ստեղծված իրավիճակին եւ ամեն ինչ կանի դրական գործընթացների սկզբնավորման համար: Շատերն են արդեն հասկանում, որ այսպես երկար չի կարող շարունակվել:

Վարդան Մխիթարյան

Այս խորագրի վերջին նյութերը