Արարատի մարզում այսօր՝ հուլիսի 29-ին, լարված իրավիճակ է ստեղծվել. Քաղցրաշեն գյուղի բնակիչներն, ի նշան բողոքի, փակել են Քաղցրաշեն գյուղ մտնող ճանապարհը եւ պահանջում են, որպեսզի Տարածքային կառավարման նախարարությունն ու Արարատի մարզպետարանը վերջապես հստակ պատասխան տան, թե երբ է, ի վերջո, գյուղի մանկապարտեզի շահագործման հարցը լուծվելու։

Shamshyan.com-ի հաղորդմամբ՝ 3 տարի է, որ մանկապարտեզը չի գործում, այս պահին շինարարական աշխատանքները դադարեցված են, քանի որ շինարարական կազմակերպությունը հայտնվել է ինչ-որ դատական քաշքշուկի մեջ:

Գյուղացիներն, ընդառաջելով գյուղապետին եւ Ոստիկանության ծառայողներին, ճանապարհը բացել են, սակայն նշել են, որ եթե մինչեւ օգոստոսի 1-ը խնդիրը չլուծվեց, այս անգամ փակելու են Երեւան-Արտաշատ մայրուղին։

***

Արարատի մարզի Քաղցրաշեն գյուղի բնակիչներն արդեն բացել են գյուղ մտնող ճանապարհը:

Tert.am-ի հետ զրույցում համայնքի ղեկավար Վալերիկ Գյուլամիրյանն ասաց, թե համայնքի բնակիչները հասկացել են իրեն:

«Վճիռը դատարանը կայացրել է, սպասում ենք բողոքարկման ժամկետի ավարտին, որ մենք մեր աշխատանքները սկսենք: Այս ամենը համայնքի բնակիչները հասկացան»,- ասաց Գյուլամիրյանը:

Արարատի մարզպետարանի լրատվական բաժնից Tert.am–ին տեղեկացրին, որ մանկապարտեզի հետ կապված դատական գործընթաց կա, քանի որ շինարարական աշխատանքներն իրականացնող «Մոնոլիտ Կապիտալ» ՍՊԸ-ի հետ պայմանագիրը լուծարել են։ Ըստ նրանց՝ շինարարական ընկերությունը խախտել է շինարարական աշխատանքներն ավարտելու ժամկետները: Երկու անգամ ժամկետները հետաձգվել են, բայց ընկերությունը 2 անգամն էլ ավարտին չի հասցրել աշխատանքները: Ընկերությունը դիմել է առաջին ատյանի դատարան, որտեղ պարտություն է կրել:

Նշենք, որ Քաղցրաշեն համայնքի բնակիչները խոստացել են կրկին փակել ճանապարհը, եթե մինչև օգոստոսի 1-ը խնդիրը չլուծվի: Այս պահին մանկապարտեզի շինարարական աշխատանքները դադարեցված են, քանի որ սպասում են դատական գործընթացի ավարտին: