ԺԱԿ կուսակցության նախագահ Սպարտակ Մելիքյանը հայտարարել է, թե Վերահսկիչ պալատն «Անանիա Շիրակացու» անվան համալսարանում կատարած ստուգումների պարագայում խեղաթյուրել է իրականությունը և վարկաբեկել համալսարանի բարի համբավն ու հեղինակությունը։ Նրա խոսքերով՝ «Անանիա Շիրակացի» համալսարանն արժանացել է խիստ քննադատության միայն այն պատճառով, որ հրաժարվել է բավարարել ստուգող խմբի ղեկավարի պահանջը՝«սև ցուցակում» չհայտնվելու համար տալ 4000 դոլար կաշառք, ինչն էլ համաձայնեցված է եղել Իշխան Զաքարյանի հետ:

«Էկոլուր» տեղեկատվական ՀԿ-ի նախագահը «7օր»-ի հետ զրույցում անդրադառնալով Սյունիքում իրականացվող ուրանի պաշարների ուսումնասիրման ծրագրին՝ ասել է, թե չնայած այն իրականացնող ընկերությունը հավաստիացնում է, որ իրենք նոր մեթոդներ են մշակում վնասներից խուսափելու համար, բայց ոչ մի երաշխիք չկա։ Ուսումնասիրություններ իրականացնող ընկերությունը «Հայ-ռուսական լեռնահանքային կազմակերպություն» ՓԲԸ-ն է, որի բաժնետոմսերի 50%-ը պատկանում է ՀՀ էներգետիկայի և բնական պաշարների նախարարությանը։

«Տարածաշրջանի ժողովուրդները պետք է խաղաղության մեջ ապրեն։ Մենք հարևաններ ենք և չենք դա կարող ժխտել։ Դա աշխարհագրություն և պատմություն է։ Եթե մենք փորձենք լուծել մեր հարցերը արդարությամբ և բերեկամաբար, բոլոր խնդիրները կգտնեն իրենց լուծումը։ ԼՂ հակամարտության լուծումն էլ հնարավոր է բանակցությունների, արդարության և փոխադարձ հարգանքի պայմաններում»։