Կարծիք

11.10.2014 14:11


«Երեկ Գագիկ Ծառուկյանը հնչեցրեց պայքարի պատրաստակամությունը»

«Երեկ Գագիկ Ծառուկյանը հնչեցրեց պայքարի պատրաստակամությունը»

Երեկվա հանրահավաքն առաջին հերթին ուշագրավ էր նրանով, որ ցույց տվեց՝ չնայած բոլոր հոռետեսական կանխատեսումներին՝ Ազատության հրապարակն իսկապես մարդաշատ էր: Երեկ, դիտելով հանրահավաքը, կարելի էր զգալ, որ Ազատության հրապարակը լիաթոք շնչում էր, իսկ Հայաստանում նման մարդաշատ հանրահավաք չէր եղել արդեն մի քանի տարի:
Ընդհանուր քաղաքական դաշտի լճացածության պայմաներում երեկվա հանրահավաքը նոր շունչ ու ոգի հաղորդեց Հայաստանում քաղաքական գործընթացներին, ցույց տվեց, որ հասարակությունը դեռ պատրաստ է պայքարի՝ հանուն փոփոխությունների:
Ի դեպ, հուսահատված լռում էին բոլոր նրանք, ովքեր «կանխատեսումներ» էին արել, թե, իբր, «եռյակի» լիդերները կարող են չգալ հանրահավաքի, կամ այն բազմամարդ չի լինելու: Լիդերները եկան, և նրանց հարթակում լինելը հենց «եռյակի» միասնության ապացույցն էր: Իսկ Գագիկ Ծառուկյանի կարճ, բայց կտրուկ ելույթը փաստեց, որ ժողովուրդը պատրաստ է գնալ պայքարի նրա հետ: Ժողովուրդը ամենաշատը հենց լիդերներից էր սպասում պայքարի պատրաստակամության մասին հայտատարություններ, և երեկ Գագիկ Ծառուկյանը հնչեցրեց այդ պատրաստակամությունը:
Բնականաբար, սոցիալական կայքերը երեկ թնդում էին նաև հանրահավաքին ուշադիր հետևող իշխանական գրչակների գրառումներից, որոնք փրփուրներից էին կախվում, քանի որ այլ գրելու բան չունեին: Բնականաբար, իշխանական մի երկու պատգամավորներ էլի իրենց էջերում ստատուսներ գրեցին, ինչը նրանց դեպքում արդեն սովորական է, քանի որ նրանք նույնպես մի բան պետք է գրեին: Դրանում է նրանց կոչումը: Բայց նույն լրատվականները նաև տեղեկություններ հրապարակեցին, որ երեկվա հանրահավաքը հենց Ազատության հրապարակում զգուշավոր դիտում էին նաև իշխանության ոչ շարքային ներկայացուցիչներ, որոնք իրար մեջ նեղսրտում էին, որ այդքան շատ մարդ է հավաքվել հանրահավաքին:
Եթե այսօր նեղսրտում են, ապա պարզ է, թե հաջորդ հանրահավաքին ինչ է կատարվելու նրանց հետ, քանի որ հաջորդ հանրահավաքը, բնականաբար, ավելի մարդաշատ է լինելու: Իսկ այն, որ ժողովրդական մարած ալիքն այլևս վերակենդանացել է, և առաջիկայում լուրջ քայլեր են կատարվելու, որևէ կասկածի տեղիք չի տալիս: Դրանում համոզվելու համար բավական էր միայն տեսնել երեկվա ոգևորությունը, միասնականության գիտակցումը և պայքարելու պատրաստակամությունը, որը թևածում էր ողջ հանրահավաքի ընթացքում Ազատության հրապարակում:
Ազատության հրապարակը կրկին շնչում է, և դա այսօրվա քաղաքական իրավիճակի ամենալուսավոր կետն է:

Արտակ Գրիգորյանի ֆեյսբուքյան էջից

Այս խորագրի վերջին նյութերը