«7օր»–ի խմբագրություն զանգահարած մի խումբ ծնողներ ահազանգել են, որ մոտ մեկ շաբաթ է` «Հայփոստ»–ից չեն կարողանում ստանալ մինչև 2 տարեկան երեխայի խնամքի համար պետբյուջեից հատկացվող 18 հազար դրամները։ Նրանց խոսքերով` սովորաբար ամեն ամսվա վերջին օրերին` գրեթե առանց ուշացումների, ստացել են նպաստները։ Սակայն սեպտեմբեր ամսվա նպաստները չկան, իսկ «Հայփոստ»–ից էլ չեն կարողանում ասել, թե որն է խնդիրը։

Ուշացման պատճառը պարզելու համար «7օր»–ը զանգահարեց Աշխատանքի և սոցիալական հարցերի նախարարություն։ Այնտեղից մեզ ասացին՝ սովորաբար ուշացումները բանկի փոխանցումների կամ «Հայփոստ»-ի տարածքային բաժինների հետ են կապված լինում։ Թե այժմ ո՞րն է խնդիրը, չգիտեն։

Զանգահարեցինք նաև «Հայփոստ». բացի մինչև 2 տարեկան երեխայի խնամքի նպաստներից` մյուս բոլոր գումարները փոխանցվել են իրենց հաշվեհամարին, իրենք էլ վճարել են։

–Փոստը վճարող կազմակերպություն է։ Սոցապնախարարությունը փոխանցում է Ֆիննախին, Ֆիննախն էլ՝ մեր հաշվին, մենք էլ վճարում ենք։ Մյուս նպաստների գումարները փոխանցված են, և ամսի 23–24–ից վճարում ենք։ Երեխաների նպաստների գումարները փոխանցված չեն։ Ֆիննախը պետք է փոխանցի, բայց մեր հաշվին այս պահին գումար չկա, որ վճարենք,–նշել են «Հայփոստ»–ից։

Ֆինանսների նախարարությունից էլ «7օր»–ին ասել են, որ պլանով 4–րդ եռամսյակում է նախատեսված փոխանցումը, և այսօր առավոտյան գումարն արդեն փոխանցվել է «Հայփոստ»-ին։ Այսինքն, նրանց պնդմամբ, ժամկետային խախտում չեն կատարել. պարզապես մինչև հիմա են փոխանցումները նախատեսվածից ավելի վաղ արել։

7or.am