Լրահոս

10.07.2009 15:04


Սամվել Կարապետյան. «Ուր որ ճակատը ազգային է, հայ մարդը բացակա է»

Սամվել Կարապետյան. «Ուր որ ճակատը ազգային է, հայ մարդը բացակա է»

Ուր որ ճակատը ազգային է, հայ մարդը բացակա է. սա իրականություն է,-«Տեսակետ» մամուլի ակումբում ասել է Հայկական ճարտարապետությունն ուսումնասիրող ՀԿ նախագահ Սամվել Կարապետյանը։ -Ծառը վտանգված է, մենք պետք է հոգս քաշենք, որ այդ ծառը չչորանա։

Սամվել Կարապետյանը լրատվամիջոցների ուշադրությանն է ներկայացրել դեռևս 2007թ. Ադրբեջանի մշակույթի նախարարության հովանավորությամբ և Իլհամ Ալիևի ողջույնի խոսքով հրատարակված՝ «Արևմտյան Ադրբեջանի հուշարձանները» վերնագրով գիրքը։

-Արևմտյան Ադրբեջան ասելով՝ նրանք նկատի ունեն այսօրվա ՀՀ սահմանները։ Այս գիրքը Ֆրանկֆուրտի տոնավաճառում անվճար բաժանել են՝ քարոզչության նպատակով,- ասել է Ս. Կարապետյանն ու նշել, որ ՀԿ-ի հիմնադիր նախագահ Արմեն Հախնազարյանն իր կենդանության վերջին ամիսների ընթացքում հասցրել է վերոնշյալ գրքի օրինակը պատճենել և փոխանցել հայաստանյան մի քանի պատկան մարմինների։

Հրատարակված գիրք-ալբոմում Հայաստանի և Արցախի բոլոր եկեղեցիները ներկայացված են որպես արմանո-թուրք, ալբանո-թուրք եկեղեցիներ, իսկ ոմանք էլ՝ որպես թուրքական գերազմանոցներ։

«7օր»-ի հարցին, թե չե՞ն պատրաստվում գրքի հրատարակողներին դատի տալ, Ս. Կարապետյանը պատասխանել է.

-Մեր գործը ո՛չ Ալիևի, ո՛չ էլ Սահակաշվիլիի հետ է։ Տեղի է ունեցել հանցագործություն, իսկ այն բացահայտելն ու պատժելը  դատարանի գործն է։ Հայաստանը պետք է հայցվոր հանդիսանա՝ սկսելով իսպառ անհետացած կամ վնասված մեր մշակութային արժեքները դատով վերականգնելու և հանցագործին պատժելու գործընթացը։

7or.am

Այս խորագրի վերջին նյութերը