Երեկ երեկոյան ՀՀԿ գործադիր մարմնի նիստում քննարկվել են ներքաղաքական, տարածաշրջանային հարցեր, այդ թվում նաև Սյունիքի նախկին մարզպետ Սուրեն Խաչատրյանի հարցը: Այս մասին լրագրողներին հայտնել է ՀՀԿ մամուլի խոսնակ Էդուարդ Շարմազանովը: Կուսակցության գործադիր մարմնի նիստը վարել է ՀՀ և ՀՀԿ նախագահ Սերժ Սարգսյանը:
«Բնականաբար Սուրեն Խաչատրյանի հարցը քննարկել ենք: Կուսակցությունում առիթ ունեցել ենք մեր տեսակետը հայտնելու այդ խնդրի վերաբերյալ: Գործը գտնվում է նախաքննության փուլում և անկախ դիրքից ու պաշտոնից յուրաքանչյուրը պետք է պատասխանատվության ենթարկվի»,-ասաց նա:
Հարցին, թե արդյոք քննարկվե՞լ է Սյունիքի նոր մարզպետի թեկնածությունը, Շարմազանովը պատասխանեց. «Որևէ նշանակման հարց չի քննարկվել: Դա մեր փոխարեն շատ ավելի լավ անում եք դուք՝ լրագրողներդ: Նույնիսկ բանը հասել է նրան, որ նշում եք, որ գեներալ-մայոր Վարդան Ավետիսյանը Սերժ Սարգսյանի զարմիկն է: Սերժ Սարգսյանը ցավոք զարմիկ չունի, քանի որ մորաքույր չունի»:
ՀՀԿ մամուլի քարտուղարի խոսքով՝ Սյունիքի մարզպետի թեկնածության հարցը կքննարկվի առաջիկայում: