«Նարեկացի» արվեստի միության Մարտի  25–29-ի միջոցառումների շարքը նվիրված է  Մեծ Պահքի վերջին` Ավագ Շաբաթվա խորհրդին:

Ավագ Շաբաթվա յուրաքանչյուր օրը խորհրդանշում է Քրիստոսի երկրային կյանքի վերջին շաբաթվա ընթացքում տեղի ունեցած առանձին դեպքեր, որտեղ  հիշատակվում են Քրիստոսի վերջին պատգամները, չարչարանքները, մահը և հարությունը:

Ավագ Երկուշաբթի օրվա  խորհուրդը մեկնեց  Հոգեշնորհ Տեր Եղիա աբեղա Խաչատրյանը.

-Ավագ երկուշաբթին  անպտուղ թզենու հիշատակության օրն է: Երբ Քրիստոս  Երուսաղեմից իջնում է Բեթանիա և այնտեղ քաղց զգալով տեսնում է մի թզենի, որը սաղարթախիտ է, բայց  պտուղ չունի: Պտուղ չգտնելով` Քրիստոս  անեծքով չորացնում է թզենին, վկայելով. «Եվ ամեն ինչ, որ ուզեք աղոթքի մեջ հավատով, կստանաք» /Մատթ. 21:18-22/: Այս առակը խորհրդանշական է. թզենին ներկայացնում է հրեա ժողովրդին, որոնք   Տիրոջ ընտրյալը լինելով` իրենց հավատքի պտուղները չունեին,  և  Քրիստոս,  ուզում էր ոչ միայն տերև տեսնել , այլ նաև պտուղ գտնել ծառի վրա:   Հրեաներից  բացի առակը ներկայացնում է  ամեն անհատի, ով թեև իր հոգու խորքում ունի  հավատք առ Աստված, բայց այդ հավատքի կենդանությունը չունի, այսինքն` հավատքը անպտուղ է և գործի չի վերածվել:  Այսօրվա ամբողջ խորհուրդը մեր հավատքը պտղաբեր դարձնելու  նշանակությունն ունի:  Մեր տիրոջ կամքն է, որ պտղաբեր  լինենք մեր հոգևոր կյանքում:

 Ավագ երկուշաբթի օրվա  երեկոն   հայ հոգևոր երաժշտության համերգով  ամփոփեց «Լուսնյակ»  վոկալ համույթը  /գեղ. ղեկավար` Լուսինե Ազարյան/:

 Երեկոն  նաև  բարեգործական էր:

«Նարեկացի» արվեստի միության սրահում  ցուցադրված  է  11- ամյա Անուշ Գևորգյանի ստեղծագործությունները: Անուշը  սահմանափակ կարողություններով է և իր կյանքն  ավելի ակտիվ դարձնելու  համար սայլակի կարիք ունի: Անուշ Գևորգյանին օգնելու համար կարող եք գումար փոխանցել  հետևյալ հաշվեհամարին.  ՎՏԲ բանկ, 16076002409304: Հեռ. 093 358898                                                                                                                                                                                               «Նարեկացի» արվեստի միություն