2008-2009թթ. ընթացքում ՀՀ վերահսկիչ պալատից ստացված արձանագրությունների քննարկման արդյունքում հարուցվել է 11 քրեական գործ: Նյութերի նախապատրաստմամբ և քրեական գործերի նախաքննության ընթացքում  վերականգնվել է 193,9 մլն. դրամ:

Այսպես՝ 2008թ. ընթացքում ՀՀ վերահսկիչ պալատից  գլխավոր դատախազությունում ստացվել է 8 արձանագրություն, նախապատրաստված նյութերով հարուցվել է 5 քրեական գործ, իսկ 3 նյութերով  որոշումներ են կայացվել՝ քրեական գործ հարուցելը մերժելու մասին: Նյութերի նախապատրաստմամբ եւ քրեական գործերի նախաքննության ընթացքում  վերականգնվել է 135 մլն. դրամ:

2009թ.  ընթացքում ստացվել  է 8 արձանագրություն, որոնցից 1-ն ուղարկվել է վերահսկիչ պալատի  նախաձեռնությամբ, իսկ 7-ը պահանջվել է գլխավոր դատախազության կողմից: Հիշյալ 7 արձանագրությունները ուղարկվել են դատախազություն կրկնակի հիշեցումից հետո՝ 5 ամիս անց՝ 2009թ. դեկտեմբերի 21-ին: Արձանագրություններից մեկում  ներկայացված են եղել  3 համայնքներում  արձանագրված խախտումների փաստեր, որոնց կապակցությամբ  նախապատրաստվել են  առանձին նյութեր: Նախապատրաստված նյութերով  հարուցվել է 6 քրեական գործ, իսկ 4 նյութերով կայացվել են որոշումներ՝ քրեական գործ հարուցելը մերժելու մասին: 2009թ. նյութերի նախապատրաստմամբ եւ քրեական գործերի նախաքննության ընթացքում վերականգնվել է 58,9 մլն. դրամ:

2010թ. ընթացքում գլխավոր դատախազությունում ՀՀ վերահսկիչ պալատից նյութեր կամ արձանագրություններ չեն ստացվել:

Ծանուցում.  ՀՀ վերահսկիչ պալատից   ստացվել են նյութեր նաեւ՝ ՀՀ կառավարության՝ 2003թ. Հուլիսի 23-ի «Առանց ծնողական խնամքի մնացած երեխաներին բնակարան տրամադրելու կարգը հաստատելու մասին» թիվ 983-Ն որոշմամբ նախատեսված բնակարանները գնելու նպատակով 2004թ. դեկտեմբերի 27-ին, 2005թ. դեկտեմբերի 27-ին եւ 2006թ. դեկտեմբերի 25-ին  ՀՀ աշխատանքի եւ սոցիալական  հարցերի նախարարության, «Սոկոլ Գրուպ» ՍՊ ընկերության միջեւ կնքված պայմանագրի  շրջանակներում կատարված աշխատանքների ընթացքում հայտնաբերված չարաշահումների վերաբերյալ: Նկատի ունենալով, որ մինչ այդ՝ 2008թ. ապրիլի 22-ին,  ՀՀ գլխավոր դատախազության պետական շահերի պաշտպանության վարչությունում ՀՀ քրեական օրենսգրքի 308-րդ հոդվածի 2-րդ եւ 188-րդ հոդվածի 3-րդ  մասերի հատկանիշներով արդեն իսկ հարուցված եղել է քրեական գործ՝ նախաքննությունը հանձնարարելով ոստիկանության քննչական գլխավոր վարչությանը, ուստի՝  վերահսկիչ պալատից ստացված նյութերն ուղարկվել են  ոստիկանության քննչական գլխավոր վարչություն՝ հարուցված քրեական գործի շրջանակներում քննության առարկա դարձնելու համար:

Նշենք, որ հիշյալ  ընկերության վերաբերյալ  նյութերը վերահսկիչ պալատից ստացվել են  դատախազության կողմից քրեական գործի  հարուցումից 6 ամիս անց:  Քրեական գործի նախաքննության ընթացքում  վերականգնվել է պետությանը պատճառված  525,2 մլն. դրամ վնասը:

Գլխավոր դատախազության մամուլի ծառայություն