Տնտեսական

10.10.2011 13:38


Տնտեսվարողները կարագի անվան տակ իրացրել են բուսասերուցքային սփրեդ

Տնտեսվարողները կարագի անվան տակ իրացրել են բուսասերուցքային սփրեդ

ՏՄՊՊՀ մոնիտորինգի արդյունքներով  արձանագրվել է, որ տարբեր վաճառակետերում իրացվող կարագի գնի միջև կա խիստ էական տարբերություն:  Խոշոր սուպերմարկետներում 1 կիլոգրամ կարագը վաճառվում է  920 դրամից մինչ 3000 դրամով: Գնային այս ակնհայտ անհամապատասխանությունը հիմք է հանդիսացել, որպեսզի Հանձնաժողովը լայնածավալ ուսումնասիրություն սկսի այս շուկայում:

Լաբորատոր փորձաքննությամբ հաստատվել է, որ կարագի ներկրմամբ և իրացմամբ զբաղվող տնտեսվարողները մոլորեցրել են սպառողներին

ՏՄՊՊՀ-ը ուսումնասիրել է կարագի ներկրմամբ և իրացմամբ զբաղվող տնտեսվարողների ողջ փաստաթղթաշրջանառությունը և հայտնաբերել Է մի շարք խախտումներ: Ապա Հանձնաժողովը վաճառքի մեկ տասնյակից ավելի վայրերից կատարել է կարագի հսկիչ գնում: Գնված մթերքը հանձնվել է լաբորատոր փորձաքննության, ինչի արդյունքում էլ լրացուցիչ կերպով հաստատվել են  փաստաթղթերում առկա խախտումները:

Այսպիսով, որոշ դեպքերում կարագի ներկրմամբ զբաղվող տնտեսվարողները ներկրել են բուսասերուցքային սփրեդ, որն անհամեմատ էժան է, սակայն այն առևտրի կետերին վաճառել են կարագի անվան տակ: Բացահայտվել են նաև դեպքեր, երբ սպառողին խաբել է ոչ թե ներկրողը, այլ հենց սուպերմարկետը, որը, քաջատեղյակ լինելով, որ ձեռք է բերել  բուսասերուցքային սփրեդ, այն վաճառել է կարագի անվան տակ: Իսկ որոշ դեպքերում էլ սուպերմարկետներում այլ կերպ են մոլորեցրել սպառողներին. Հայտարարել են, որ ակցիայի շրջանակում անհամեմատ էժան գնով վաճառվում է կարագ, բայց, իրականում վաճառել են բուսասերուցքային սփրեդ՝ կարագի համար խիստ էժան, իսկ սփրեդի համար՝ բավականին բարձր գնով:

Տեղեկացնենք նաև, որ բուսական ծագում ունեցող սփրեդի 1 կիլոգրամը կարագից էժան է ավելի քան 1000 դրամով:

Վարչական վարույթ. Օրինախախտները կենթարկվեն պատասխանատվության

Այսպիսով, Հանձնաժողովի որոշմամբ, հարուցվում է վարչական վարույթ՝ օրինախախտ ներկրողների  և իրացնող տնտեսվարողների հանդեպ: Վարչական վարույթի արդյունքների մասին օրենքով սահմանված ժամկետում կտեղեկացվի հանրությանը:

ՏՄՊՊՀ Մամուլի քարտուղար՝ Գայանե Սահակյան

Այս խորագրի վերջին նյութերը