«Daily Mail» պարբերականը, հղում անելով ազգային օդերևութաբանական ծառայությանը, հայտնել է, որ ԱՄՆ–ի տարածքի 15 նահանգներում հաստատված անբնական շոգի հետևանքով անցած շաբաթվանից զոհերի թիվը հասել է 64–ի։

Ինչպես փոխանցում է «ՌԻԱ նովոստի»–ն, ավելի վաղ հաղորդվում էր 22 զոհերի մասին։

Օդերևութաբանների տվյալներով՝ մի շարք տարածքներում ջերմաստիճանը գերազանցել է Ֆարենհայթի սանդղակով 90⁰ աստիճանը (32⁰C), բայց բարձր խոնավության պատճառով այն զգացվել է 100–110⁰–ին (37–43⁰C) համարժեք։

Շոգից զոհվածների մեծ մասն ապրում էին ԱՄՆ–ի կենտրոնական՝ Օկլահոմա, Կանզաս, Միսսուրի և Իլինոյս նահանգներում։

Մասնագետների խոսքերով՝ ներկայումս ջերմաստիճանը մի փոքր իջել է, սակայն հավանականություն կա, որ հաջորդ շաբաթ տարածաշրջանի մի մասը կրկին կհայտնվի ուժեղ անտիցիկլոնի ազդեցության ներքո։