«Շատ անկեղծ կլինեմ. Ես որոշակի հույս ունեի, որ այսպիսի հարցի վերաբերյալ ներքաղաքական օրակարգ չի լինելու, քանի որ ինքնին տեքստը այնպիսին էր, որ այն ուղղված էր բացառապես թուրք-ադրբեջանական տանդեմին: Այսինքն՝ այս հայտարարությունից կարող էին նեղսրտել միայն այդ երկու պետությունները՝ իրենց ժողովուրդներով հանդերձ»,-168.am-ի «Ռեվյու» հաղորդաշարի հերթական թողարկման ընթացքում ասաց ԱԺ «Հայաստան» խմբակցության պատգամավոր Արամ Վարդևանյանը՝ անդրադառնալով «Քաղաքացիական պայմանագիր» խմբակցության՝ ընդդիմադիր նշյալ խմբակցության առաջարկած թուրք-ադրբեջանական «Շուշիի հռչակագրի» դեմ հայտարարությանը չմիանալուն:

Նրա խոսքով՝ այնտեղ գնահատական չկար իշխանությունների վարքագծին, որ իրենք են հանգեցրել նրան, որ նման հռչակագիր է ընդունվել, և առհասարակ չկար որևէ նման քննադատություն:

«Բայց այնպես ստացվեց, որ փաստորեն նույնիսկ այսպիսի փաստաթղթին այս իշխանությունները դեմ են»,-ասաց Արամ Վարդևանյանը:

Դիտարկմանը, թե կառավարող խմբակցությունն ասում է, որ ժամանակին Արտաքին գործերի նախարարությունը (ԱԳՆ) հայտարարությամբ հանդես է եկել այդ հռչակագրի առնչությամբ, պատգամավորը նկատեց, որ ԱԳՆ-ն այդ հայտարարությունը տարածել է այն ժամանակ, երբ պարզապես Ալիևն ու Էրդողանը ստորագրել էին հռչակագիրը, և վավերացում չկար:

«Ի վերջո, վավերացումը նաև իրավական ընթացակարգ է, որի պայմաններում, ստացվում է, այդ երկու պետությունները հաստատում են իրենց պարտականությունների վերջնական լինելն այդ հռչակագրի շրջանակներում: ԱԳՆ-ի հայտարարությունը այն ժամանակահատվածում էր, երբ նախարարն ու փոխնախարարները հրաժարական էին տվել, բայց այնուամենայնիվ, որոշակի հայրենասիրական պատկերացումներից ելնելով՝ արձագանքել էին: Բայց նորից հիշեցման կարգով նշեմ՝ այս իշխանություններն ինչ քննադատություն ասես հնչեցնում են ԱԳՆ-ի այդ կազմի վերաբերյալ՝ սկսած տհաճ բառապաշարից՝ մինչև նրանց հետ խորը անհամաձայնություն: Հիմա այս ձևակերպումը դիսոնանս է առաջացնում: Թող իրենք մի հատ կողմնորոշվեն՝ լա՞վն էր այն ԱԳՆ-ն, թե՞ ոչ, և երկրորդ՝ ի վերջո, ԱԳՆ-ի այդ հայտարարությունը վերաբերում էր այդ հռչակագրի՝ պարզապես ստորագրմանը»,-ասաց Արամ Վարդևանյանը՝ նշելով, որ ներկայիս ԱԳՆ-ն այդ վավերացման առնչությամբ որևէ արձագանք չի տվել:

Նա տարակուսած էր ՔՊ-ական պատգամավորի այն տեսակետից, թե ինչ է տեղի ունեցել, ընդամենը վավերացվել է, և նրանց պատկերացումն այն է, որ վավերացումն ինչ-որ տեխնիկական գործառույթ է:

«Շուշիի հռչակագրի ամենավտանգավոր դրույթն այն է, որ Արցախի վերաբերյալ են այնտեղ գնահատականները կատեգորիկ, ընդհուպ՝ Արցախը բացառապես Ադրբեջանի կազմում տեսնելու մասով: Սա ոչ թե հերթական հոխորտանքն է հարցազրույցների ձևով, այլ իրավական փաստաթուղթ, որը նաև վավերացվել է: Այնտեղ նաև մի ձևակերպում կա «Զանգեզուրի միջանցք» այդ տխրահռչակ կոնցեպտի վերաբերյալ: Անգամ պատկերացում կա, որ մինչև 2023թ. այդ հարցը պետք է լուծվի: Հիմա դրա վերաբերյալ որ մենք արձագանք չենք տալիս, ո՞ւմ շահն ենք սպասարկում, ի՞նչ ենք սրանով արձանագրում: Ի վերջո, սա նաև ՀՀ Անկախության հռչակագրի դեմ հռչակագիր է»,-ասաց Արամ Վարդևանյանը:

Հարցին՝ ինչո՞ւ ՔՊ-ական պատգամավորները ջերմեռանդությամբ չէին պաշտպանում իրենց դիրքորոշումը, ընդդիմադիր պատգամավորը պատասխանեց, որ իր տպավորությամբ՝ նրանք ևս համերաշխ չէին այդ տեսակետի հետ:

«Ես չեմ կարող պատկերացնել, որ 71 ՀՀ քաղաքացի կարող է նման կերպ միատեսակ կարծիք ունենալ ՀՀ շահերի դեմ գնացող վարքագծի մասով: Այլ հարց է, որ այնտեղ նրանք ունեն աննախադեպ կառավարելիության խիստ դիսցիպլինա, որը դասական իմաստով նման է բռնապետական ռեժիմի, որտեղ բռնապետն ունենում է այդ աստիճան կառավարելի խարհրդարան»,-ասաց Արամ Վարդևանյանը:

Պատգամավորը հռետորական հարց է հնչեցնում՝ իսկ ինչպե՞ս է ստացվում, որ Ալիևի զառանցանքներին այս իշխանությունը պատասխան չի տալիս:

«Ֆոսֆորային զենքեր կիրառող, մինչ այժմ ռազմագերիներ պահողին արձագանք չես տալիս, դրանց օժանդակած Թուրքիային ոչինչ չես ասում… Ինչո՞ւ չես արձագանքում… Այդ բայրաքթարները կառավարիչներ ունեին, չէ՞…»,-ասաց Արամ Վարդևանյանը՝ շեշտելով՝ չի կարող Հայաստանը՝ որպես պետություն, չունենալ «կարմիր գծեր»:

Պատգամավորի խոսքով՝ իրենք, անշուշտ, այս հարցը կտեղափոխեն դրսի հարթակ, սակայն ներսի լսարանի համար սա նույնպես կարևոր արձանագրում է:

«Ես վստահորեն եմ պնդում՝ 4 տարվա ընթացքում այնպիսի տեղեկատվական աղետ է եղել ՀՀ-ում՝ այս իշխանությունների կողմից ուղղակիորեն կազմակերպված, որը մինչ օրս շարունակվում է: Մեր հասարակության ստվար զանգվածը, օրինակ, գիտեր, որ Նիկոլ Փաշինյանը չի ստորագրել նոյեմբերի 9-ի փաստաթուղթը, որովհետև իրենք դա կարդացել էին մամուլում կամ Ֆեյսբուքում: Ես այդ մասին որոշեցի բարձրաձայնել ԱԺ-ում, և Նիկոլ Փաշինյանը որոշեց արձագանքել՝ ասելով, որ ինքն է ստորագրել փաստաթուղթը ու հպարտ է դրա համար»,-ասաց Արամ Վարդևանյանը:

Մանրամասները՝ տեսանյութում։