Այսօր լրագրողների հետ հանդիպման ժամանակ մարքսիստական կուսակցության նախագահ Դավիթ Հակոբյանն անդրադարձել է ղարաբաղյան հակամարտության կարգավորման գործընթացին։

–Արցախի հարցը այսօր լուրջ դիվանագիտական ծուղակի մեջ է, այնպես, ինչպես հայ–թուրքական հաշտեցման ֆուտբոլային դիվանագիտությունը։ Սպասվում է մի տարբերակ, երբ առաջին զոհը կպահանջեն Հայաստանից տալ, թեկուզ` 2-3 ազատագրված շրջանի ձևով, «ա  տամ դալշե վիդնը բուձետ»։ Միջազգային հանրությունը Արցախին հստակ կարգավիճակ զիջումների դիմաց չի նախատեսում, առայժմ՝ միայն միակողմանի զիջումներ, հակառակ դեպքում ՀՀ–ի նկատմամբ կլինեն բոլոր ուղղություններով ճնշումներ,–հայտարարել է Դավիթ Հակոբյանը։

Ըստ նրա՝ ՀՀ–ին այսօր անհրաժեշտ է «դիվանագիտական թայմ–աութ». կա՛մ Հայաստանը պետք է դուրս  գա բանակցային գործընթացից՝ իր տեղը զիջելով Արցախին, կա՛մ էլ նախագահը պետք է հրաժարական տա։

–Եթե գլխավոր սուբյեկտի դերում հետագայում հանդես գա Արցախը, կարծում եմ, որ անգլո–սաքսոնական դիվանագիտության ճիրաններից ազատվելու միակ տարբերակը Արցախի միացումն է ՌԴ–ին՝ որպես քաղաքական սուբյեկտ՝ իր սահմանադրությամբ որդեգրված 14 հազ. քառ. կմ–ով,– նման կարծիք է հայտնել Հակոբյանը։

Հարցը, թե կա՞ արդյոք տարբերություն ղարաբաղյան հակամարտության նկատմամբ Լևոն Տեր–Պետրոսյանի ու Սերժ Սարգսյանի մոտեցումների միջև, Դավիթ Հակոբյանն ուղղակի շրջանցել է անգամ կրկնակի հնչելուց հետո։ Պատասխան նա տվել է, սակայն այն հարցի բուն էության հետ ոչ մի էական կապ չի ունեցել և հստակ չի եղել։

7 or.am