Քաղաքական

14.05.2021 10:07


ԱԱԾ սահմանապահ զորքերի նախկին հրամանատարին հրավիրել են հարցաքննության. «Ժողովուրդ»

ԱԱԾ սահմանապահ զորքերի նախկին հրամանատարին հրավիրել են հարցաքննության. «Ժողովուրդ»

ՀՀ զինվորական քննչական ծառայությունը հարցաքննության է հրավիրել ԱԱԾ սահմանապահ զորքերի նախկին հրամանատար Վաղինակ Սարգսյանին: Այս տեղեկությունը հայտնի է դարձել «Ժողովուրդ» օրաթերթին։

Օրաթերթի տեղեկություններով՝ ԱԱԾ-ում քննվում է մի քրեական գործ, որի շրջանակներում էլ Սարգսյանին հրավիրել են հարցաքննության: Իսկ թե կոնկրետ ինչ քրեական գործի մասին է խոսքը, «Ժողովուրդ»–ին պարզել չի հաջողվել:

Հիշեցնենք, որ Վաղինակ Սարգսյանը ԱԱԾ սահմանապահ զորքերի հրամանատար էր նշանակվել 2018-ի հունիսի 11-ին: Նշանակումը պատահական չհամարվեց, քանի որ ապրիլի 23-ին Երևանում Սերժ Սարգսյանի վարչապետության դեմ «Իմ քայլը» նախաձեռնության բողոքի ակցիային հանկարծակի միացան ՀՀ զինված ուժերի խաղաղապահ բրիգադի մի խումբ զինծառայողներ՝ համազգեստներով, իսկ ՀՀ ԶՈւ խաղաղապահ ուժերի բրիգադի հրամանատարն այդ ժամանակ Վաղինակ Սարգսյանն էր:

ՀՀ ՊՆ-ն քննադատել էր այս քայլը՝ հայտարարելով, որ բանակը պետք է դուրս լինի քաղաքականությունից և քաղաքական գործընթացներից: Նկատենք, որ հոկտեմբերի 26-ին՝ սահմանապահ զորքերի հետ հանդիպման ժամանակ, նրա հետ թեժ քննարկում էր ունեցել նաև ԱԱԾ տնօրենի պաշտոնակատար Միքայել Համբարձումյանը:

Այս խորագրի վերջին նյութերը