Ադրբեջանի նախագահ Իլհամ Ալիևը հայտարարել է, որ չի բացառում Մոսկվայում ՀՀ վարչապետ Նիկոլ Փաշինյանի հետ հանդիպման հավանականությունը, բայց նաև հավելել է, որ ՌԴ նախագահ Վլադիմիր Պուտինից նման հրավեր չի ստացել։ Այս մասին տեղեկացնում է РИА Новости-ն։

«Այո՛, դա հնարավոր է, այդպիսի հանդիպումներ կայացել են նաև նախկինում։ Ամեն ինչ կախված է օրակարգից։ Ցավոք, հակամարտության խաղաղ կարգավորման հեռանկարները Հայաստանի ներկայիս կառավարության պայմաններում շատ հեռու են»,-ասել է Ալիևը ճապոնական Nikkei թերթին։

«Ես բազմիցս այցելել եմ Մոսկվա՝ նախագահ Պուտինի հրավերով։ Անգամ տարվա մեջ մի քանի անգամ։ Այնպես որ, բարձր մակարդակով այդ շփումները սովորական երևույթ են գործընկեր և հարևան երկրների միջև։ Նախագահ Պուտինը նույնպես ոչ մեկ անգամ է ժամանել Ադրբեջան»,-ավելացրել է Ալիևը։