«Հոկտեմբերի 27»-ի գործով ցմահ դատապարտյալ Նաիրի Հունանյանի թեմայի օրակարգ բերելու, դրա պատճառների մասին Tert.am-ը զրուցել է 1999 թվականին պատգամավոր ընտրված, 1999թ. հոկտեմբերի 27-ին խորհրդարանում գտնված Վարդան Բոստանջյանի հետ:

-Պարոն Բոստանջյան, ինչո՞ւ է օրակարգ բերվել Նաիրի Հունանյանի թեման:

-Ես էլ եմ ցանկանում հասկանալ` արդյոք ի՞նչ նպատակ է հետապնդվում՝ այդ թեման օրակարգ բերելով: Ամեն դեպքում` ես ինքս տեսել եմ այդ պրոցեսը, երևույթը. հիմա էլ տարբեր կայքեր գրում են, որ դրա համար (թեման օրակարգ բերելու) մարդիկ են եղել շահագրգռված, որոնք ցանկացել են տեղավորվել ամենատարբեր պաշտոններում: Ամենայն հավանակնությամբ, դրա չլինելու հետևանքով հիմա այլ ուղղություններ են փնտրում:

-Գուցե Հունանյանին ցանկանում են օգտագործել իշխանություների համար անցանկալի մարդկանց դեմ ցուցմունքներ կորզելու համա՞ր:

-Եթե հանկարծակի այդպիսի բան էլ տեղի ունենա, ես դրան զարմանքով չեմ նայի, որովհետև հասկանում եմ, որ իշխանության դեմ պայքարը մարդկության պատմության մեջ միշտ եղել է այդպես: Հասկանում եք՝ ոչ մի ներում ու բեկում չկա, իշխանության համար պայքարում դիմում են ամենավատ միջոցների և, իմ խորին համոզմամբ, այստեղ է գործում այն գաղափարը, երբ ասում են՝ նպատակին հասնելու համար ցանկացած միջոց արդարացված կարող է համարվել:

-Մտավախություն չունե՞ք, որ «Մարտի 1»-ի գործով իրենց ցանկալի արդյունքներին չեն հասնում, հիմա ցանկանում են օգտագործել Հունանյանին:

-Հնարավոր է, որովհետև բոլոր դեպքերում՝ և՛ «Մարտի 1»-ի գործի, և՛ ընդհանրապես հանրապետությունում տեղի-անտեղի ձերբակալությունների պատճառով ինչ-որ տեղ մարդու արտասվել և ծիծաղ է գալիս: Նույնիսկ կարծիքներ կան, որ մարդուն ձերբակալում են, որից հետո են մտածում` արդյոք պատճառ կա՞, թե՞ չկա: Հիմա նման պայմաններում ամեն ինչ հնարավոր է:

-Կարծո՞ւմ եք, որ թե՛ այդ կալանավորումները, մարդկանց ազատությունից զրկելը, թե՛ Հունանյանի հարցի օրակարգ բերելը մի շղթա է, որով իշխանությո՞ւն են ցանկանում պահել:

-Այո, այդպես եմ կարծում:

-Արդյո՞ք վտանգված է իշխանությունը, որ նման քայլերի դիմեն:

-Թույլ իշխանության համար միշտ էլ վտանգներ գոյություն ունեն: Երբևիցե որևէ մեկը չի կարող համոզված լինել, որ ինքը հաստատուն իշխանությունը պահելու է, և դա հավերժ է լինելու: Խոշոր առումով՝ ցանկացած իշխանություն տեսանելի և անտեսանելի ձևով իր արտացուլումն է ստանում հասարակության մեջ: Ժողովուրդը, որքան էլ ապակողմնորոշված լինի, կամ ժողովրդական լեզվով ասած՝ խաբված լինի, թեկուզ ուշ, բայց հասկանում է, թե ինչն ինչոց է, ուստի որևէ իշխանություն չի կարող համոզված լինել, որ իրենք հաստատուն են և միշտ:

-Պարոն Բոստանջյան, ԱԺ պատգամավոր Արման Բաբաջանյանը դիմել է վարչապետին՝ Հանրային խորհրդի նախագահ Վազգեն Մանուկյանին պաշտոնանկ անելու պահանջով. այս մասին ի՞նչ կասեք:

-Ես Վազգեն Մանուկյանին ճանաչում եմ հայ իրականության մեջ հատկապես վերջին շրջանի ժամանակներում որպես ամենախոշոր մտածողներից ու երկրի համար ցավացող մարդկանցից մեկը: Բոլոր նրանք, ովքեր հանկարծակի կփորձեն Վազգեն Մանուկյանին որևէ բան ասել, դա շատ վտանգավոր բան է, այդ մարդիկ, կարող է պատահի, որ ամոթից զոհվեն, որովհետև բոլորը չափազանց ու անսահման փոքր են Վազգեն Մանուկյանի առջև: