Լրահոս

08.05.2019 22:11


Ապագայի միջնակարգ դպրոցն անվանակոչվել է ապրիլյան քառօրյա պատերազմում զոհված կապիտան Հովսեփ Կիրակոսյանի անունով (ֆոտոշարք)

Ապագայի միջնակարգ դպրոցն անվանակոչվել է ապրիլյան քառօրյա պատերազմում զոհված կապիտան Հովսեփ Կիրակոսյանի անունով (ֆոտոշարք)

ՀՀ Արմավիրի մարզպետ Համբարձում Մաթևոսյանի որոշմամբ Ապագայի միջնակարգ դպրոցն անվանակոչվել է Ապրիլյան քառօրյա պատերազմի հերոս, ինժեներասակրավորային վաշտի հրամանատար, կապիտան Հովսեփ Կիրակոսյանի անունով: Անվանակոչության առթիվ դպրոցում այսօր տեղի է ունեցել հիշատակի միջոցառում, որին հերոսի ընտանիքի անդամների, հարազատների, համագյուղացիների և մեծաթիվ հյուրերի հետ ներկա են գտնվել նաև մարզպետ Համբարձում Մաթեւոսյանը, Ազգային ժողովի փոխնախագահ Լենա Նազարյանը և Արմավիրի թեմի առաջնորդ Տեր Սիոն արքեպիսկոպոս Ադամյանը:

Ողջունելով միջոցառման մասնակիցներին` մարզպետն ասել է. «Այսօր մենք այստեղ ենք մեր հարգանքն ու խոնարհումն արտահայտելու Ապրիլյան քառօրյա պատերազմում հերոսաբար զոհված կապիտան Հովսեփ Կիրակոսյանի հիշատակին և վերահաստատելու, որ ոչ ոք և ոչինչ չի մոռացվում։ Եվ մենք, չմոռանալով մեր հերոսի սխրանքը, այսօր հավերժացնում ենք նրա հիշատակը՝ հայրենի գյուղի դպրոցն անվանակոչելով իր իսկ անունով։

Անկախ ժամանակագրությունից` մենք երբեք չենք մոռանա 2016 թվականի ապրիլյան պատերազմը, որը մեր ժողովրդին հերթական անգամ դաժան փորձության ենթարկեց: Ինչ խոսք, մեր ազգի նվիրյալների անկոտրում կամքի, քաջության և անձնազոհության շնորհիվ այդ փորձությունն էլ հաղթահարվեց պատվով:

Եվ այսօր պատիվ ունեմ ասելու, որ մեզ խաղաղություն պարգևած նվիրյալներից մեկն էլ կապիտան Հովսեփ Կիրակոսյանն էր, ով մարտի դաշտում անգամ ծանր վիրավորումից հետո պայքարեց թշնամու դեմ՝ ուժերի վերջին լարումով նռնակով պայթեցնելով թշնամու զինվորներին, իսկ իր զինվորներին հրամայելով. «Տղե՛րք, ես լավ եմ: Դուք կռվե՛ք»:

Այս խոսքերով էլ նա ավետեց իր երկրային կյանքը։ Ընկավ հերոսի մահով, որպեսզի հայոց աշխարհում հավերժի խաղաղությունը, և ավարի ու ավերումի սովոր թշնամին այլևս ոտք չդնի Արցախ աշխարհում։

Ցավոք, հայ ժողովրդի հերոսական պատմության հերթական էջը գրվեց տասնյակ կյանքերի արյան գնով՝ դառնալով հայրենասիրութան բաց դաս ապրողներիս համար։ Իսկ այդ օրերին ապրած ցավը շաղախվեց քաջերի կատարած սխրանքի հետ և մեզ պարգևեց հպարտության, երկրի անվտանգության և առաջընթացի ապահովման գործում պատասխանատվության առավել մեծ զգացում:

Եվ թող մենք՝ ապրողներս, մեր ազնիվ աշխատանքով, Հայրենիքի հանդեպ մեր անմնացորդ նվիրումով կարողանանք արժանին մատուցել մեր հերոս նահատակներին։

Ի դեմս Հովսեփ Կիրակոսյանի՝ գլուխ եմ խոնարհում հայրենիքի պաշտպանության համար ընկած բոլոր քաջերի հիշատակի առջև և ասում՝ ձեր սխրանքն անմահ է, ձեր անունը՝ մեր սրտերում։
Հավերժ փառք ձեզ»:

Ավարտելով իր ողջույնի խոսքը` մարզպետը ներկաներին շնորհավորել է նաև մայիսյան հաղթանակների կապակցությամբ` մասնավորապես ընդգծելով. «Մեր ոգին անկոտրում է, իսկ մենք անհաղթ ենք միասին»:

Հիշատակի միջոցառման շրջանակում Ապագայի Հովսեփ Կիրակոսյանի անվան դպրոցի սաները ներկաներին ողջունել են օրվա խորհուրդը լրացնող ելույթներով` երգ ու պարով, ասմունքով:

Կրթօջախի համար հանդիսավոր օրը նշանավորվել է նաև Հովսեփ Կիրակոսյանի կիսանդրու բացմամբ, որի պատիվը վերապահվել է մարզպետ Համբարձում Մաթևոսյանին և Հովսեփ Կիրակոսյանի կնոջն ու զավակներին:

ՀՀ Արմավիրի մարզպետարանի

տեղեկատվության և հասարակայնության հետ կապերի բաժին

59674315_2262050900540347_8694718471033847808_n 59821705_420680928721383_2316042156382355456_n 59722771_447899612612043_5698655740403646464_n 59646715_410142596249148_1674626857019899904_n 59754343_338170973555152_8630459051546771456_n 59782427_817971241910645_541510060795232256_n 59808128_289209478695219_8087531660133793792_n 59915415_1139553416205696_6193821085440409600_n 59924576_410985919485373_6535432115465486336_n 60079600_411817559653404_1735437443538092032_n

Այս խորագրի վերջին նյութերը