Մոսկվայի մետրոյում այսօր առավոտյան տեղի ունեցած պայթյուններից հետո ԱՊՀ մի շարք երկրների մետրոներում ուժեղացվել են անվտանգության միջոցառումները։ Հայաստանի մետրոպոլիտենի «Բարեկամություն» կայարանի կայարանապետ Գևորգ Ավետիսյանն այս կապակցությամբ «7օր»-ին ասել է, որ թեև մետրոյի աշխատակիցները հատուկ չեն նախազգուշացվել, բայց ոստիկաններն է՛լ ավելի աչալուրջ են։

-Ոստիկաններն առավոտվանից ավելի ուշադիր են, պետերն իջնում են, հետևում են, գործի հանդեպ շատ լուրջ տրամադրվածություն է նկատվում իրենց կողմից,- ասել է Գ. Ավետիսյանը։

Նա նաև հավելել է, որ ընդհանրապես մետրոպոլիտենի աշխատակիցները միշտ էլ ուշադիր են, և եթե անգամ ուղևորը խմիչքի ազդեցության տակ է ցանկանում մուտք գործել մետրո, հրավիրում են ոստիկաններին, վերջիններն էլ իրենց հերթին նրան հրավիրում են բաժին և պարզում մանրամասները։

7or.am