Հայաստանում Ֆրանսիայի հյուպատոս Ֆրեդերիկ Գրապեն լրագրողների հետ հանդիպման ժամանակ ասել է, որ իրենց շատ հաճախ հարց են տալիս, թե վիզաներ տրամադրելու համար ինչո՞ւ է այդքան շատ փաստաթուղթ պահանջվում, և ինքը ցանկանում է ասել պատճառը։

-Վիզան՝ ելքի արտոնագիրը, ընդամենն այն տարրերից մեկն է, որը հնարավորություն է տալիս թափանցելու շենգենյան գոտի, որովհետև սահմանային ծառայության պատասխանատուները միանգամայն իրավասու են և երբեմն անգամ պարտավոր են պահանջել ճանապարհորդից ներկայացնել այս կամ այն փաստաթուղթը։ Պահանջում են՝ ելնելով իրենց երկրի կանոնադրությունից, և երբ այստեղ մենք բոլոր փաստաթղթերն ենք պահանջում, ասենք՝ բժշկական ապահովագրություն  և այլն, դա նրա համար է, որ պարզապես չենք ցանկանում, որ սահմանային համապատասխան ծառայության ներկայացուցիչները զանգեն ու ասեն, թե ձեր երկրի քաղաքացին գտնվում է միջազգային չեզոք գոտում, որովհետև պահանջելու պահին չի կարողացել ներկայացնել փաստաթղթերից որևէ մեկը։ Շատ կան դեպքեր, երբ մարդիկ,  հասնելով օդակայան, չեն կարողացել մտնել Ֆրանսիայի տարածք պահանջվող փաստաթղթերից որևէ մեկը չունենալու պատճառով,-նշել է նա։

Հյուպատոսը նշել է, որ շենգենյան գոտու հյուպատոսությունները չեն ցանկանում խոչընդոտել հայերի ճանապարհորդությունը։

-Ընդհակառակը՝ ամենայն անկեղծությամբ ասեմ, որ կարծում եմ՝ որքան ավելի շատ հայերը ճանապարհորդեն, այնքան ավելի շատ հայ երիտասարդությունը հնարավորություն կունենա վերապատրաստվելու, շտկվելու, կրթվելու, և ինչպես մի հայտնի մտածող է ասել՝ որքան ավելի շատ մարդ հնարավորություն ունենա այլ երկրների օդը շնչելու, այնքան երկիրը (տվյալ դեպքում՝ Հայաստանը) կզարգանա,-հավելել է Ֆրեդերիկ Գրապեն։

Նրա խոսքերով՝  հյուպատոսարան դիմող քաղաքացու գործերը (դոսիեն) որքան լիարժեք են, տրամաբանորեն ավելի կապակցված, այնքան ավելի են նվազում մերժվելու հնարավոր դեպքերը։

7or.am