Հարցազրույց

17.03.2010 20:00


Արմեն Երիցյան

Արմեն Երիցյան

ՀՀ ԱԺ-ում լրագրողների հարցերին է պատասխանել ՕԵԿ քվոտայով ՀՀ արտակարգ իրավիճակների նորանշանակ նախարար Արմեն Երիցյանը

-Ձեզ ՕԵԿ-ում ավելի շատ դուր եկավ գաղափարախոսությո՞ւնը, թե՞ որ Արթուր Բաղդասարյանը Ձեր ընկերն է, այդ պատճառով դարձաք ՕԵԿ-ական։

-Ե՛վ որ Արթուր Բաղդասարյանն է իմ ընկերը, և՛ գաղափարախոսությունը, քանի որ ես ուզում եմ, որ մենք ունենանք օրինաց երկիր, երկիր, որտեղ օրենքի առաջ բոլորը հավասար են։

-Բայց հիմա ընդհանրապես մոդա է հանրապետակա՛ն դառնալը։

-Ես գիտեմ համազգեստի մոդա, բայց այդպիսի մոդայից ես տեղյակ չեմ։

-Ձեր համազգեստին չե՞ք կարոտելու։

-Անպայման։ Ես 30 տարի կրել եմ այդ համազգեստը, ինչպե՞ս կարող եմ չկարոտել։

-Մի պետություն կմատնանշե՞ք, որտեղ բոլորն օրենքի առաջ հավասար են։

-Չի կարելի այդպես ասել, որ կա մի պետություն, որտեղ բոլորն օրենքի առաջ հավասար են։ Վերցնենք Ֆրանսիան, մյուս պետությունները, բոլոր տեղերում կան խախտումներ, իրավազանցներ, բայց բոլորը պետք է օրենքի առաջ հավասար լինեն։ Դա երազանք է։

-Այսօր մամուլում հրապարակումներ են եղել, որ ՀՀ նախագահ Սերժ Սարգսյանը հեռացրել է Մհեր Շահգելդյանին, քանի որ վերջինը ՀՀ արտակարգ իրավիճակների նախարարության «Պետական ռեզերվների գործակալություն» ՊՈԱԿ-ը ՀՀ պաշտպանության նախարարությունից ստացած 2,5 մլրդ դրամի ալյուրը փչացրել է, ապա կես գնով հանել վաճառքի:

-Ես տեղյակ չեմ ալյուրներից։

-Ասում են նաև, որ փոփոխությունները պարտադրված են եղել Սերժ Սարգսյանի կողմից։

-Այս փոփոխության հեղինակը եղել է Արթուր Բաղդասարյանը, և երկրի նախագահը համաձայնվել է։

-Դուք ՕԵԿ անդամ դարձաք, որ նախարա՞ր լինեք։

-Ես այդ հարցին պատասխանեցի։

-Եթե Արթուր Բաղդասարյանի հետ վաղեմի ընկերներ եք, ինչո՞ւ հենց սկզբից չմտաք այդ կուսակցություն։

-Ես ոստիկան եմ եղել, իսկ ոստիկանը ՀՀ սահմանադրությամբ իրավունք չունի լինել կուսակցական։

-Կարելի՞ է ենթադրել, որ Դուք երբևէ չեք մտածել գլխավոր ոստիկանապետ դառնալ, այդ պատճառով էլ թողեցիք ոստիկանությունը և դարձաք կուսակցական։

-Ես սովոր եմ կատարել իմ առջև դրված խնդիրները։ Ոստիկան թե առաջին տեղակալ՝ երկրորդական է։ Յուրաքանչյուր ոստիկան իր առջև դրված խնդիրներ ունի։ Երազել-չերազելն այլ խնդիր է։

-Եթե հանկարծ Ձեր պորտֆելը վերցնեն, դուրս կգա՞ք ՕԵԿ-ից։

-Ո՛չ, դուրս չեմ գա։ Դուք ինքներդ էլ կարո՞ղ եք հույս ունենալ, որ ես մնալու եմ։

-Եթե հանկարծ Արթուր Բաղդասարյանը հրաժարական տա, Դուք մնալո՞ւ եք ՕԵԿ-ում, եթե նույնիսկ առանց պաշտոն լինեք։

-Իհա՛րկե։ Ես պաշտոնամոլուցքով երբևիցե չեմ տառապել։

-Եթե ՕԵԿ-ը դուրս գա կոալիցիայից, կշարունակե՞ք մնալ ՕԵԿ-ում։

-Այո՛։

-Այնիպիսի ծիծաղով եք պատասխանում, կարծես կատակ եք անում, և Դուք էլ Ձեր ասածներին չեք հավատում։

-Ես միշտ էլ հավատում եմ։ Եթե ես ժպտում եմ, նշանակում է, որ ամեն ինչ լավ է։ Ծիծաղելը և ժպտալը տարբեր հասկացություններ են։

Հատվածը ներկայացրեց Արեգնազ Մանուկյանը

Այս խորագրի վերջին նյութերը