ՕԵԿ նախագահ Արթուր Բաղդասարյանը լրագրողների հետ հանդիպման ժամանակ ասել է, որ ինքը չի մասնակցելու առաջիկա նախագահական ընտրություններին, բայց  ՕԵԿ-ով մասնակցելու է խորհրդարանական ընտրություններին։ Իսկ այն հարցին, թե ինչո՞ւ չի մասնակցելու նախագահական ընտրություններին, նա պատասխանել է, որ իրենք Սերժ Սարգսյանի հետ ռազմավարական համագործակցության համաձայնագիր են կնքել և առաջնորդվելու են դրանով։

Ինչ վերաբերում է նախարարների փոփոխությանը, Արթուր Բաղդասարյանն ասել է, թե Արմեն Երիցյանի և Մանուկ Վարդանյանի հետ իրենք բավական լավ և մտերիմ հարաբերություններ ունեն և նրանց փոփոխությունը պայմանավորված է ներկուսակցական  բարեփոխումներով։ Ըստ  ՕԵԿ առաջնորդի՝ կուսակցության առօրյա կյանքով պետք է զբաղվեն ավելի բանիմաց մարդիկ, ոչ թե երիտասրադ սերունդը, և այդ առումով Մհեր Շահգելդյանը, ինչպես նախկինում, զբաղվելու է կուսակցության քաղաքական և գաղափարական ծրագրերով, իսկ Գուրգեն Սարգսյանը՝ տնտեսական ոլորտով։

Արթուր Բաղդասարյանը նաև նշել է, որ Արմեն Երիցյանն ու Մանուկ Վարդանյանը ՕԵԿ անդմաներ չեն եղել, սակայն նախարար նշանակվելու վերաբերյալ ՀՀ նախագահի հրամանից հետո անդամագրվել են կուսակցությանը։

7or.am