Լրագրողների հետ հանդիպման ժամանակ ԱԺ ՀՀԿ խմբակցության անդամ Հովհաննես Սահակյանը անդրադառնալով «Ընտրական օրենսգրքում փոփոխություններ և լրացումներ կատարելու մասին» օրինագծին՝ հայտարարել է, թե այս փոփոխություններն է´լ ավելի արդյունավետ և ժողովրդավարական ընտրություններ կապահովեն:

Պատասխանելով այն հարցին, թե արդյոք օրեսնդրական նոր փոփոխությունները կարգավորելո՞ւ են ընտրություններից առաջ բարեգործական նախաձեռնությունների անվան տակ քարոզարշավ իրականացնելու երևույթները՝ նա ասել է, թե եթե բարեգործությունն արվում է անընդհատ և ոչ թե ընտրություններից առաջ, ապա պետք չէ բարեգործությունը սև շղարշով պատել:

Այն հարցին, թե արդյոք ՀՀԿ-ի բուժօգնության ծրագիրը չի՞ դիտարկվում որպես նախընտրական քարոզարշավ, Հավհաննես Սահակյանը պատասխանել է.

-ՀՀԿ-ն ընտրություններին սկսում է նախապատրաստվել կայացած ընտրությունների հենց հաջորդ օրը։  Ասեմ, որ ՀՀԿ-ն բուժօգնություն տրամադրել է և՛ նախորդ տարիներին, և՛ հիմա, և՛ անցած ընտրություններից առաջ։ Ի՞նչ վատ է, որ հայ մարդը առանց պետական բյուջեից կոպեկ իսկ օգտվելու՝ իր հայրենակցին օգնում է բուժօգնություն ստանալ։ Վատ բան կա՞,-նշել է նա։

-Բայց շաբաթը մեկ դա պետք է քարոզվի՞ լրատվամիջոցներով,-հետաքրքրվել են լրագրողները։

-Իսկ ինչո՞ւ չցուցադրվի,-հարցադրում է կատարել Հովհաննես Սահակյանը։

Հիշեցնենք, որ ԱԺ պատգամավոր Վիկտոր Դալլաքյանը խոսելով բարեգործների մասին՝ մեջբերել էր Ալ. Շիրվանզադեից՝  առանց որևէ մեկի անունը հնչեցնելու. «Կարելի՞ է այդ ինքնօրինակ շահադիտական զգացմունքը բարեգործություն սրբազան անունով մկրտել, կարելի՞ է բարեգործ անվանել այն մարդուն, որ տալիս է ո՛չ թե օգնելու համար, այլ փոխարենը կրկնակի ստանալու մտքով: Այլևս չենք խոսում, թե ինչ քստմնելի միջոցներով է նա ձեռք բերել այն, որի մի չնչին կտորը շպրտում է կարոտյալին»։

Գուցե ՀՀԿ-ի՞ն նկատի ուներ Վիկտոր Դալլաքյանը։

7or.am