Լրահոս

17.08.2009 17:57


Որտե՞ղ են կառավարության խոստացած վարկերը

Կառավարության հակաճգնաժամային ծրագրում հատուկ տողով գրված է, որ օտարերկրյա վարկերից ֆինանսավորում պետք է հատկացվի փոքր ու միջին բիզնեսին՝ վարկերի տեսքով:

Օտարերկրյա վարկերն արդեն Հայաստանում են, սակայն Շիրակի մարզի այն 12 գործարարները, որոնց բիզնես նախագծերին հավանությունն էր տրվել կառավարության կողմից, և որոնք ընդգրկված էին վարկեր ստացող գործարարների ցուցակում, մինչև հիմա որևէ ֆինանսավորում չեն ստացել:

Մարալիկի «Անի կաթ» ձեռնարկությունում վարկավորմանը սպասում են դեռևս մարտ ամսից: «Անի կաթ» ՓԲԸ տնօրեն Յուրա Գաբրիելյանը վարկերի ստացման վերաբերյալ «7 օր» -ի հարցին մեկ պատասխան է տալիս. «Դեռևս սպասում ենք», իսկ Գյումրիի մանվածքային ֆաբրիկայի՝ «Արշալույս» ԲԲԸ նախագահ Ռոբերտ Զաքարյանը, ում ձեռնարկությունը ևս ընդգրկված է այդ ծրագրում, թեև կրկին սպասողական իրավիճակում է, բայց լավատեսությունը չի կորցնում. «Հնարավոր է, որ տան. եթե ասել են, ուրեմն կտան. էդպես բան չի լինի, որ չտան»,-ասում է Ռոբերտ Զաքարյանը

Ծրագիրը, որը մշակվել էր դեռևս այս տարվա հունվարին, նախատեսում էր առնվազն գարնան սկզբին վարկեր տրամադրել գործարարներին: Դեռ հունիս ամսին Փոքր ու միջին ձեռնարկությունների զարգացման ազգային կենտրոնի Շիրակի մարզի մասնաճյուղում հավաստում էին, որ գումարները կան, և դրանց փոխանցումը ձեռնարկատերերին տեխնիկական խնդիրների հետ է կապված: Նույնիսկ ժամկետներ էին նշվում՝ առնվազն 15 օր: Ըստ ՓՄՓԶԱԳ-ի՝ Շիրակի մարզի մասնաճյուղի տնօրեն Արթուր Զաքարյանի խնդիրը միայն ներդրումային հիմնադրամի ստեղծումն էր, որից հետո վարկերը կհայտնվեին ձեռնարկատերերի հաշվեկշռում: Սակայն երկու ամիս անց ՓՄՁԶԱԿ-ում հարցի վերաբերյալ նույն պատասխանն են տալիս՝ գումարները կան, ստեղծվում է ներդրումային հիմնադրամ: Առավել սպառիչ պատասխան կամ մոտավոր ժամկետներ վարկերի տրամադրման վերաբերյալ այստեղ հրաժարվում են նշել՝ խորհուրդ տալով դիմել ՀՀ Կենտրոնական բանկ։

Դերենիկ Մալխասյան

Գյումրի

Այս խորագրի վերջին նյութերը