ՀՀԿ խմբակցության ղեկավար Գալուստ Սահակյանը Ուկրաինայում ստեղծված լարվածությունը նորմալ չի համարում, բայց և ընդվզումները չի դատապարտում, եթե դրանք օրենքների և Սահմանադրության շրջանակներում են։

–Ուկրաինայում բնակվում է 40–50 մլն մարդ, և բնական է, որ պիտի լինեն զանգվածներ, որոնց համար ընդունելի չէ ԵՄ ասոցացման համաձայնագրին չմիանալու որոշումը,–«7օր»–ի հետ զրույցում ասել է Գ. Սահակյանը։

Ինչ վերաբերում է Հայաստանին, և թե ինչո՞ւ սեպտեմբերի 3–ից հետո, երբ Սերժ Սարգսյանը հայտարարեց Մաքսային միությանը միանալու իր որոշման մասին, մեր երկրում նման լայնածավալ բողոքի գործողություններ և ընդվզման ալիք չբարձրացավ, ՀՀԿ խմբակցության ղեկավարը նկատել է.

–Որովհետև զանգվածային այդ գաղափարախոսությունը Հայաստանում չկար, որ պետք է գնանք դեպի Եվրոպա։

Մեր դիտարկմանը՝ չէ՞ որ մինչ այդ հենց իշխանական դաշտն էր Սերժ Սարգսյանին «արևմտամետ»–ի պիտակ փակցնում, Գ. Սահակյանը չի համաձայնել.

–Մենք երբեք ո՛չ արևմտամետ ենք եղել և ո՛չ էլ ընդհանրապես «մետ» ենք եղել։ Մենք ասում ենք, որ ժողովրդավարական չափորոշիչները մեզ համար ամենաընդունելի գործիքներն են՝ մեր երկրում իրողությունները, կառավարման մոդելները հասցնելու եվրաչափանիշներին, և այդ ճանապարհով էլ գնալու ենք։

7or.am