Այսօր լրագրողների հետ հանդիպմանն ԱԺ ՀԱԿ խմբակցության անդամ Լյուդմիլա Սարգսյանն անդրադառնալով հայ հասարակությանը կենսաթոշակային համակարգի պարտադրմանը, ասել է, որ Հայաստանում հիմնականում չի ընդունվում որևէ օրինագիծ, որը կբխի հասարակության շահերից:

«Այսօր արդեն չեն բավարարվում բյուջեի թալանով և սկսել են թալանել անմիջապես բնակչությանը, մտնում են մարդկանց գրպանները և մնում այնտեղ»,-նշել է Լ. Սարգսյանը:

Պատգամավորն ընդգծել է, որ իրենց խմբակցությունը դեմ է պարտադիր կենսաթոշակային համակարգին, և իրենք կանգնած են պայքարող հասակարության կողքին:

Խոսելով ՀՀ-ի` Մաքսային միությանն անդամակցելու մասին, բանախոսն ասել է, որ դա այլընտրանք չուներ, սակայն պետք է տեղի ունենար հաշվարկված և դանդաղ. «Իշխանությունները պետք է ազնիվ բանակցեին թե’ Ռուսաստանի, թե’ ԵՄ-ի հետ, խորհրդակցեին երկրի քաղաքական ուժերի հետ և նոր կայացնեին ինչ-որ որոշումներ»,-նշել է Լ. Սարգսյանը` հավելելով, որ իշխանությունները շարժվել են իրենց շահերով, այլ ոչ թե ժողովրդի, իսկ գլխավոր որոշումները գաղտնի են կայացվել: