Նիդեռլանդների հավաքականի կիսապաշտպան Արյեն Ռոբենը մեկնաբանել է «Եվրո-2012»-ի խմբային փուլի  2-րդ մրցափուլի շրջանակներում կայանալիք Գերմանիայի հավաքականի հետ հանդիպումը:

«Գերմանիայի ընտրանու հետ հանդիպումը մեր թիմի համար որոշիչ կլինի: Մենք վստահում ենք մեր ուժերին: Կարող ենք և պետք է հաղթենք: Միայն այդ դեպքում ամեն ինչ լավ կլինի, և մենք կկարողանանք դուրս գալ խմբից:

Գերմանացիները աշխարհի առաջնությունում երրորդն էին, նրանց թիմը երիտասարդ է և ֆիզիկապես ուժեղ: Գերմանիայի ներկայիս հավաքականում նաև շատ այնպիսի ֆուտբոլիստներ են ընդգրկված, ովքեր կարող են ստեղծարար աշխատանք տանել խաղադաշտում: Սակայն ես հանգիստ եմ զգում խաղից առաջ:

Ցավալի է, երբ երկու տիտղոս ես ձեռքից բաց թողնում: Շատ մոտ էինք այդ տիտղոսների նվաճմանը, իսկ Չեմպիոնների լիգայի եզրափակիչը պարզապես անհեթեթություն էր»,-Ռոբենի խոսքերն են մեջբերում  նիդեռլանդական լրատվամիջոցները: