Մայիսի 15–ի առավոտյան Թեհրանում կախել են 24–ամյա «իսրայելյան լրտեսին», ում մեղավոր են ճանաչել իրանցի միջուկային ֆիզիկոսի սպանության մեջ։ Իրանի քաղաքացի Մաջիդ Ջամալի Ֆաշին մահապատժի է դատապարտվել պրոֆեսոր Մասուդ Ալի Մոհամադիի սպանության համար։ Գիտնականը զոհվել էր 2010թ. հունվարին, երբ նրա մեքենայի կողքին պայթել էր ականապատ մոտոցիկլը։

Ֆաշին խոստովանել է, որ Մոհամադիին սպանել է իսրայելի հատուկ ծառայության՝ «Մոսսադի» առաջադրանքով։ Նա նաև ասել է, որ սպանության համար իսրայելցիներն իրեն 50 հազ. դոլար են խոստացել, սակայն վճարել են այդ գումարի միայն կեսը։ Ֆաշին հայտնել է նաև, որ ինքը ծրագրում էր  այլ սպանություններ ևս, որոնց կատարումից հետագայում հրաժարվել է։ Մասնավորապես, նա որոշել է չսպանել ֆիզիկոս Մաջիդ Շահրիարիին, որն այնուամենայնիվ հետագայում սպանվել է։

Վերջին մի քանի տարում Իրանում սպանվել է առնվազն 5 միջուկային գիտնական։ Թեհրանը համարում է, որ նման կերպ Իսրայելը և ԱՄՆ–ը փորձում են կանգնեցնել Իրանի միջուկային ծրագիրը։